Reverende pater, domine colendissime! etc. Dominus Hyeronimus^a Radperger, v. r. p. capellanus, die decima nona huius mensis (Sept. 19) se conspectui meo praesentavit literas p. v. r. credentiales offerendo, quibus perlectis inter loquendum sibi commissum dicebat vestram r. p. plurimum demirari, quod breve tanto tempore super re mihi cognita inexpeditum mansisset, cum eo vestra r. p. plurimum indigeret. Cui ex literis missivis vestrae r. p. literas inhibitorias quaesitas in faciem exhibui, quibus me culpandum in negligentiis minus iuste aperte cognovit. Nam dudum p. v. r. et conventui super confirmatione satisfecissem, prout ex magistro Maximiliano Ia^egernreuter et literis meis, si ad manus vestrae r. p. pervenissent, quas cum quodam domino Iohanne Strigl ex Landsperg pro ordinibus sacris per magistrum Casparum Stolz ad me misso misi, ipsi magistro Caspari pariter vestras detulit epistolas, a quo si partes Austriae attigerit, sciscitetur. Scripseram inter alia, qualiter reverendus dominus noster episcopus Pataviensis undique nobis viam expediendi et breve et bullas aptata in eo^b . . . . . . . . reverendissimi domini nostri cardinalis Senensis licet obstruxerit, nihilominus per medium cuiusdam camerarii secreti pontificis in lentum vestrae r. p. consecutus fuissem et ob eam expeditionem prothocolum ex magistro Iohanne Hagenwiler ad obligandum p. v. r. et monasterium ipsum pro certa pecuniarum summa scitu praefati domini doctoris Maximiliani, qui etiam mecum fidejubere, ut promiserat paternitati v. r., pro certa pecuniarum summa paratus inveniebatur, extraxi et in publicam formam redigi et manu et signo dicti Iohannis notarii muniri procurabam nihilque restabat, nisi ut litterae apostolicae in bancum expeditae traderentur et bancharii nisi de pecunia promissa responderent, eandem vero vester Froschelmoser, mercator Salzburgensis, cum suo interesse rehabiturus bancharius quoque ad ipsum bullas apostolicas ordinasset. Haec dum a nobis perfici curarentur, venit inhibitio paternitatis v. r., quam eidem latori cum instrumento ad obligandum praefato etiam exhibui, ex bancho recuperatum in praesentiarum mente et anima mutatis accepi. Et iterum pro expediendo brevi et litteris sollicitabo addamque, ut abbas futuro perpetuo tempore confirmationem ab abbate Campililiorum vestro monasterio vicino recipere possit soluta pecuniarum summa ipsi abbati camerae tamen apostolicae applicanda, quae solita fuit solvi pro huiusmodi confirmatione ordinarie, et si banchum in ea reperiam, depositione brevi in Salzeburgam eiusmodi litteras ordinabo. Sin autem propter absentiam domini doctoris Maximiliani et defectum fideiussorum induci ad mutuandas pecunias ad expeditionem necessariam non poterit, curabit vestra r. p. in tempore per medium vestrum Froschelmoser aut alium in Urbem ordinari similes pecunias. Obtinui pro coenobio Gemnicensi, ut quatuor ecclesias eis incorporatas per presbyteros ad nutum ammovibiles^a perpetuis futuris temporibus regere possint, licet datarius supplicationem pro compositione retineat, eam tamen redeunte domino Bernhardo de Polheÿm ex Neapoli omnino habebo. Ad eam indulgentiam si placuerit eas haberi; pariter ordinabitis pecunias. Habeo modum expediendi et praeterea paternitas v. r. citationem super parochiali^a ecclesia in Meisling exequi procuret, nam omnino ipsam ecclesiam evincere studebo. Possedit enim magister Colomannus Hymler parochialem^a ecclesiam in Haderstorff cum ipsa in Meisling absque dispensatione apostolica, de quo certissimus sum. Misit enim ad me pro huiusmodi dispensatione impetranda. Non impedit executionem citationis eius absentia, si iuxta^c . . . . . . . tantum in loco beneficii, hoc est, parochialis^a ecclesiae habita primum diligenti perscrutatione, si sit in loco, publicetur taliter, quod notarius in instrumento executionis scribat, qualiter huiusmodi citationem tempore, quo missarum solemnia agerentur, affixit praetereuntibus materna linqua exposuit et quantum in eo fuit, ipsas literas apostolicas declaravit et ad eorum notitiam indubitatam deduxit, deinde amotis literis originalibus mittat in eorum locum copiam auscultatam. Similiter in ecclesia cathedrali itidem faciat, quod lubens Georgius Randert, plebanus in Osterperg prope Pataviam, in meo nomine optime in curia notus legaliter exequatur. Is etiam huiusmodi citationem cum executione in Urbem mittere optime novit. Inserueram quoque meis de quibus supra litteris, qualiter Udalricus Lyenfelder se jactitabat in Urbe se magistro Iohanni Landsperger in vita super parochiali^a ecclesia in Naliub vestrae r. p. collationis movisse lites. Si quid is attemptaret, ut possessor titulum cum mandato mittat, ipsum eleganter defendere scirem. Item generaliter Kilianus Geyer obtinuisset dilationem contra Michaelem Hu^epler super parrochiali^aecclesia in Kilb. Dicti Kiliani procurator Franciscus de Senis hoc mense mortem^a obiit. Dilationem obtineri in causa sibi commissa minime adhuc, ut praesentes coram avisari possint, dubito. Si quid tamen p. v. r. cum dicto Michaele occasione ipsius ecclesiae attemptare intendit, significet et eidem scriptis p. v. r. pronam offerat pensionem, residuum mihi in concordia addendo reservat. Videbo, ne nimium ipsa gravetur ecclesia. Vereor eundem victorem eminus evasurum et Kilianum causam deserere. Scripseram etiam, quod vigore indulgentiarum stationum monasteriis paternitatis vestrae et membris eorundem concessarum nemo absolvi posset, sed absolutione et in caritate et communione fidelium a labe insontibus subveniretur et quod suo tempore huiusmodi indulgentias per supplicationem, quatenus paternitati v. r. videretur, obtinere vellem et quod duntaxat religiosis pro spirituali recreatione concederentur. Item quod pro magistro Achatio mihi fautore singularissimo et unico, plebano in Hainfeld, indulgentias et confessionale pro omnibus dioecesanis obtinere non possem, quibus, si eidem visum fuerit, mittat modum, quo expeditio fieri possit, cum uno beatissime omnium paternitatem v. providebo extra auxilium domini reverendissimi Senensis. Item quidam Iohannes Kerner, clericus Frisingensis dioecesis, familiaris reverendissimi domini cardinalis Valentini, nepotis sanctissimi domini nostri, posuit gratiam suam expectare ad collationem paternitatis v. r., cui casu, quo aliqua vocatio de collatione paternitatis v. r. spectans evenerit, clypeo suo et umbra amico aliquo cum possessione prima ordinaria provisione adesse poterit. Ero inter illum et Ioannem amicabilis compositor et litium diremptor. Haec erant in prioribus literis de verbo ad verbum scripta. Alia scripta digna non occurrunt. Novitates aliae non sunt nisi, quod serenissimi regis Romanorum adventus in Urbem hoc hyemali tempore instanter expectatur. His paternitas vestra feliciter valeat, quam cunctipotens in longa conservet tempora. Ex Urbe die XXIII septembris anno 1496. Qualis modo sit mansio mea in Urbe, ex praesentium exhibitore intelligere lubeat. Posset enim capere princeps aliquis Germanie, ut mediaret.||
Eximiae p. v. r. deditissimus inservitor Rupertus Spiegl.

Source Fulltext: FUCHS, Göttweig III (=FRA II/55, Wien 1902) S. 298-301