Animum etc. Cum domino Iohanne Rudel superioribus diebus significaveram paternitati v. r., qualiter clerici camere pro iocalibus ex consuetudine ipsis debita occasione bulle exempcionis paternitatis v. r. et monasterii Gotbicensis primum petiissent ducatos centum, deinde descendissent ad L, quibus pluribus se firmabant diebus, finaliter obtuli eis ducatos viginti, quos cum magna difficultate tandem receperunt et bullam mihi assignarunt, quam in presenciarum per banchum Fugkarorum, qui pro eius ex camera liberacione dictos viginti ducatos mutuo dederunt cum interesse solito, vestre p. r. transmitto. Eam cum sumpto bulle Nicolai summa custodia conservari suadeo. Gravibus enim impensis et laboribus obtenta fuit. Faciet paternitas v. r. eas per aliquem prelatum et si placet per dominum prepositum Viennensem aut abbatem Melicensem, executores deputatos, exemplari ipsumque exemplum seu earum transsumptum in foro contencioso, dum opus fuerit, exhibeatur et non originales, ne id accidat, quod cum bulla Nicolai factum intellexi.¹ Si quid dominus reverendissimus Pataviensis aut aliquis alius contra huiusmodi exempcionem attemptaret, habebatur recursus ad dictos executores, qui eam exempcionem sub penis et censuris contra quoscunque manutenebunt voluntate et iussu pontificis. Heri vestrae r. p. familiaris Petrus in Urbem venit, vestre r. p. litteras et copiam citacionis sibi presentandi commissas consignavit. Eundem, postquam bonam habebit comitivam, dimittam cum litteris meis. Alia cum domino Iacobo plebano in Hallpach habunde accepit vestra r. p., quam deus longo conservet evo. Ex Urbe die octava iulii anno etc. 99.||
Eximie r. p. v. deditissimus inservitor Rupertus Spiegel.

Source Fulltext: FUCHS, Göttweig III (=FRA II/55, Wien 1902) S. 367