Premissa etc. Septima huius presentis lator Petrus, reverende pater, domine colendissime, litteras vestre r. p. cum cuiusdam civis Saltzeburgensis Virgilii Froschelmoser et nonnullas copias praesertim cuiusdam citacionis a reverendo patre domino Guilhelmo de Pereriis auditore emanate et ultima maii per edictum publicum in locis ad hoc deputatis execute presentavit. Terminus ad comparendum in citacione contra paternitatem v. r. decreta prefixus est L dierum et cadit in vigesimum huius. Sed quia octava huius indicte fuerunt vacancie usque kalendas octobris, terminus primus comparicionis erit prima die iuridica octobris et tunc inchoabitur processus. Ad dictum mensem octobris paternitas v. r. claram ad me ordinabit omnium gestorum informacionem. Fundant se adversarii in bina successive facta visitacione et in prima paternitatem v. r. repertam fuisse et convictam de inutili administracione et propterea venia petita et obtenta spe melioracionis vite ex gracia episcopi in abbaciali dignitate permansisse. Secunda per episcopum cepta et postea per eiusdem episcopi Pataviensis suffraganeum continuata, qui sua sentencia paternitatem v. r. ab abbaciali dignitate ammovit etc. Hec per adversarios in commissione narrata de necessitate per eos verificari debent. Cogentur itaque pro verificacione expositorum suorum suggestorum summo pontifici omnia inter vos acta saltem authentice producere. Producta si fuerint, fideliter examinari curabo et si qua nullitas apparuerit, retractabitur eorum processus ex eorum actis. Ordinem tamen rei geste videlicet, qualiter episcopus Pataviensis non modo visitandi, sed vescendi unam ja^egersuppen se in monasterium invitari procuraverit, eiusmodi invitacionis litteras ad me ordinabit vestra reverenda paternitas, deinde quibus prelatis, quo tandem ordine visitaverit et in quo contentus fuerit et quid visitacione a paternitate v. r. exequerit seu petierit et per quos et quem voluit facta per paternitatem v. r. pretensa resignacione abbaciali dignitati preficere et an preficiendus fuerit tunc in monasterio et an fuerit membrum monasterii vestri et quid abbas electus Gotbicensis pro confirmacione episcopo Pataviensi tribuat. Hec ad longum litteris significate. Item specificentur creditores monasterii, quibus paternitas v. r,, dum fuerat in regimine, satisfecit et si sunt quittancie de perceptis pre manibus, mittantur quoque, item litere exempcionis bonorum. Item informentur Romipete super structuris per paternitatem v. r. factis. Hec omnia si non plene probabunt, erunt tamen pro obtinenda remissoria ad partes et hiis habitis formalius formabuntur articuli. Preterea paternitas vestra mittat mandatum sui procuratorium speciale ad ipsam causam. Habeo enim, ut vestra r. novit p., procuratorium generale per paternitatem v. r. et non conventum, dum eratis in Urbe, factum, quod fortassis, cum causa sit magne reputacionis, non sufficiet. Fiat igitur nova constitucio in loco conventuali vocatis singulis qui haberi possunt fratribus per sonum campane et nominentur in huiusmodi constitucione: Antonius Poldo, Laurentius Algast, Ioannes Fabri, Allexander de Bononia ex eo cum clausula substitucionis. Advertat preterea paternitas v. r. ad illos, qui disturbio in monasterio facto inter episcopum et paternitatem v. r. interfuerunt, ut si aliqui ex his Urbem peterent, mittantur ad me, quos tandem in huiusmodi causa producam in testes. Si episcopi acta vigore rescripti alias paternitati v. r. missi facta non extraherent, extrahantur per paternitatem v. r., et mittantur ad me et hiis si opus fuerit producam ad acta. Omnino ante kalendas octobris nil attemptabitur. Mittantur preterea pecunie pro defensione cause, quia semper pro notariis advocatis cursoribus hiis indigebimus. Quid actum sit de ducentis et quadraginta florenis Renensibus, clare ex litteris meis cum plebano in Halspach missis v. r. paternitas accepit. Bullas exempcionis pridie presente Petro in banchum Fucharorum in Saltzeburgam ad Virgilium Froschelmoser mittendas dedi. Quid clericis camere pro hiis exsolvi, ex litteris quoque meis accipietis. Ex copia instrumenti excommunicacionis vidi paternitatem v. r. et dominum Andream excommunicatos fuisse, quare paternitatem v. r. cras vel postcras absolvi faciam. Et si paternitas v. r. habita huiusmodi excommunicacionis noticia se divinis immiscuisset, incurrisset profecto maculam irregularitatis, quae privat quemquam beneficiis. Significatis quantocius et faciam paternitatem v. r. restitui et rehabilitari. Venient huiusmodi litterae ad quinque ducatos etc. Facultas creandi notarios apud vos leviori pecunia haberi poterit quam hic, quia religiosis non libenter datur, cum ab huiusmodi actibus publicis se abstinere debeant. Indulgencias ad capellam instaurandam in Prucendorf presentium latore, si paternitas v. r. specificasset litteris patronum capelle, item festa IIII, in quibus indulgencie huiusmodi plus prodesse possunt populo, item oratorem, ad cuius instanciam impetrari debent. In calce litterarum paternitatis v. r. reperi, quod me publice procuratorem et syndicum vestre r. p. et monasterii non appellarem, ymo publice talis vocari non velim. Salva p. v. reverencia tales sic loquentes veritati parcunt, cum notissimum sit in civitatibus Saltzeburgensi, Pataviensi et earum dioecesi, ad quas saepius defendendo et iustificando partes vestre r. p. scripsi, me procuratorem vestre r. p. eciam et in Urbe cunctis constat. Hec raptissime summis caloribus scripsi. Rome die XIII iulii anno etc. 99.||
Eximie r. p. v. deditissimus inservitor Rupertus Spiegel, procurator.

Source Fulltext: FUCHS, Göttweig III (=FRA II/55, Wien 1902) S. 368-370