Reverende pater, domine colendissime! etc. Vigesima nona mensis transmoti (1499 Dec. 29) presentium exhibitor litteras vestre r. p. et quoddam registrum, quo exolucio debitorum durante vestra administracione monasterii Gotbicensis continetur [asportavit].^a In ipsius registri plica quoque recepi manum venerabilis viri, domini Iohannis Prenner, secretarii reverendissimi domini nostri episcopi Pataviensis, super ja^egersuppen vestre paternitati r. directam. Ea suo tempore non parum cause conducet. Id quod superioribus significaveram v. r. paternitati de qualibet per prefatum dominum episcopum aut eius deputatum facta visitacione, qua ad administracionem dignitatis magis v. r. paternitas fuit reperta ydonea, ex commissione cause didici, quibus ea et plura alia seculari principi suggesta mendacia continentur in deduccione cause verificanda per eos. In ipsa hactenus de intencione adversariorum causa non constat, nec quidquam preiudiciale intentarunt. Scripsi cum Petro familiari paternitatis v. r. pro mandato speciali ad causam, quod hodie expecto. Habeo confectam constitucionem formalem per paternitatem v. r. et dominum Andream seniorem coram domino Iohanne Iagemaler notario satis antiquam et multum generalem, quam hodie ad acta nostra produxi exspectans specificum paternitatis v. r. solius absque conventu. Sola enim paternitas v. r. citata exstitit ad instanciam episcoporum. Habeo nihilominus quottidie familiarem specialem vigilem in condictis super eos et si aliquos testes affuturos et subordinatos forsan produceret, ad repellendos eos et ad danda interrogatoria. Antiquo huiusmodi me iuvarem, licet conventum sit nomine paternitatis v. r. et conventus monasterii, quare primo fido nunccio ad me ordinetur mandatum. Quod arguor de raris missivis ad paternitatem v. r. datis, et minus meo^b videtur iuste. Nam prioribus temporibus nullus occurrit cursor, cui tute litteras committere potuissem, neque omnibus proficiscentibus ad has litteras committendas^c videntur. Vereor enim, ne id, quod paternitati v. r. accidit, ut littere ad vos ordinatas^d ad manus prefati domini episcopi perveniant, mihi accidat. Hoc tamen iubilei anno propter nuncciorum copiam frequentior ero in scribendo. Non demiretur paternitas v. r., quod pro clara negociorum gestorum scripserim informacione. Facilius enim imbibitur^d iniuria per passum quam astantem seu auditorem. Habeo singula scripta in ea re per dominum Iohannem Bome propter allata, que aliquantulum eciam inter se discrepant, conficiam tamen formaliter articulos contra adversariorum intencionem, cum opus fuerit. Non videtur mihi consultum, ut efficiamur actores, sed expectandum erit, quid adversarii moliantur. Familiares banchi Fugkarorum habent avisamenta a Froschelmoser de satisfaccione integra super mutuatis paternitati v. r., sed de centum florenis ad causam ordinatis per dictum Froschelmoser perceptis et quos per^e in Urbem per eum mitti deberentur vel certi habentur, quare paternitas v. r. iterum eundem ut mittat. Sollicitari faciat hiis me paternitati v. r., cum ad presens alia scribenda non occurrant, nisi quod sanctissimus dominus noster portam auream, sub malediccione ut quidam dicunt de anno MCC et XXV, alii primo 37. anno clausam, in vigilia nativitatis domini propriis manibus astantibus reverendissimis dominis cardinalibus aperuit eamque marmoreo tabulatu decoravit. Me ad vota paratissimum offero. Ex Urbe prima ianuarii etc. V^C.||
Eximie v. r. p. deditissimus inservitor Rupertus Spiegel.||
Qui casus sint reservati pontifici et qualiter peregrini iubilei annum consequantur, ex bullis hiis allegatis v. r. p. intelliget.

Source Fulltext: FUCHS, Göttweig III (=FRA II/55, Wien 1902) S. 373-375