In nomine domini. Vlricus dei gratia Patauiensis episcopus uniuersis Christi fidelibus tam natis quam nascituris salutem in Christo. Quia pastoralis offïcii cura, quam deo dante suscepimus, nos admonere dinoscitur, ut iuri uniuscuiusque subditorum nostrorum tam paterna sollicitudine curemus prospicere, quatenus id quod quis iuste assequitur, in pacis quiete per confirmationis nostre presidium in perpetuum se gaudeat possessurum. Hinc est, quod ad uniuersorum notitiam presentem paginam intuentium cupimus peruenire , quod causa que inter nos ex parte una, et uenerabiles fratres nostros Fridericum abbatem et conuentum de Jerus ex altera super ecclesia Drozendorf uertebatur est de nostro ac ipsius abbatis et conuentus assensu taliter diffinita, ut Perngerus in ipsa ecclesia Drozendorf omnibus diebus suis sub nomine nostro perpetuus debeat esse uicarius, certum tamen censum ex ea XXV. talenta uidelicet prefato abbati et conuentui annis singulis soluturus. Vnde et ipse omnes illius ecclesie pertinentias tam in decimis quam aliis omnibus possessionibus plene percipiet sicuti uerus pastor. Et ut hec rata et inconuulsa permaneant, presentem paginam conscribi et conscriptam nostri impressione sigilli consignari fecimus testium nominibus subnotatis. ||
Hij fuerunt testes. Wezelo abbas Chotewicensis. Gotfridus archidiaconus. Heinricus de Poingarten. Chunradus custos, Patauienses canonici. Reinbertus. Einwicus. Siboto. Chuno. Heinricus capellani. Otto de Heichenbach marscalcus. Waltherus dapifer de Tanneberch. Otto de Morspach. Heinricus Naeliubaere¹. Chunradus Chambarius et alii quam plures. Datum apud Moutaren per manum Chunradi notarii nostri XIII Kalend. Octob. Anno Dni M.CC.XVIIII. Indict. VII. Pontificatus nostri anno quarto.

Source Fulltext: MAYER, Geras (= AÖG 2, 1849) S. 13, Nr. 3