Gregorius episcopus seruus seruorum dei dilectis filiis abbati et conuentui sancte crucis in Austria salutem et apostolicam benedictionem. Ea, que iudicio uel concordia terminantur, firma debent et illibata consistere, et, ne in recidiue contentionis scrupulum relabantur, apostolico conuenit presidio communiri. Eapropter dilecti in domino filii uestris iustis postulationibus grato concurrentes assensu compositionem, que inter uos ex parte una, et abbatem et conuentum de Medelich nomine monasteriorum uestrorum ex altera super quibusdam decimis amicabiliter auctoritate apostolica intercessit, sicut sine prauitate prouide facta est, et ab utraque parte sponte recepta et hactenus pacifice obseruata, auctoritate apostolica confirmamus et presentis scripti patrocinio communiuimus. Nulli ergo omnino hominum liceat, hanc paginam nostre confirmationis infringere, uel ei ausu temerario contraire. Si quis autem hoc attemptare presumpserit, indignationem omnipotentis dei et beatorum Petri et Pauli apostolorum eius se nouerit incursurum. Datum Perusii kalendis Octobris, pontificatus nostri anno secundo.

Source Fulltext: WEIS, Heiligenkreuz (=FRA II/11, 1856) S. 71