Ego A. dei gracia rex Hungarie omnibus presens scriptum inspecturis notum facio, quod abbati ecclesie sancte crucis in Austria super terram byssenorum nomine Leguentov, quam eidem per priuilegium contulimus, talem concessimus libertatem, quod de triginta mansionibus hominum, quos ipse abbas super eandem terram collocauit, nullam exactionem, uidelicet nec libertinos denarios, nec pondera, nec tributum, nec tricesimam, nec aliquam collectam lucri camere nostre, nec ullam omnino pensionem, que succedente tempore in regno nostro emergere possent, alicui persoluat, set remota contradictione qualibet tota illa pensio ad usus abbatis predicte ecclesie colligatur, quam pro remedio anime nostre, predecessorum successorumque nostrorum in donum deo oblata sunt. Et ideo terram dictam cum iam dictis prouentibus sic extra cameram nostram liberrimam ac exemptam esse uolumus, sicut nobis a deo retribui cupimus. Concessimus etiam, ut populus dicte terre nec ad incidendas indagines, nec fossam faciendam extra castrum uel citra musuniense, siue alias a quoquam ullo modo ire compellantur, nec etiam denarios, qui uocantur Uothpenez alicui persoluant, sed etiam chibriones vinearum, que ibi ab eisdem triginta mansionibus facte fuerint, eidem ecclesie totaliter recipiantur. Pronuntiamus etiam cum auctoritate regia, quod nullus iudex eos iudicare audeat, nec aliquis exactor coram aliquo, preter nos uel quem uice nostra nos eis iudicem constituerimus, cum eisdem fratribus uel populo contendere audeat. Hoc ideo dicimus, ne aliquis adeo nobis premium repromissum sua falsa audacia uel improbitate perdat. Volumus etiam eos liberos in portis, in pontibus et in omnibus locis siue importando sua, siue exportando nostra donaria, uidelicet pisces, sales, animalia, lanam, agnos, caseos, siue annonam, uel certe (?) frumentum, seu quelibet alia, nec non et domos, et curiam, et cellarium, quas ipse abbas in Musunio construxit, ab omnibus tributariis, monetariis, tricenariis, salinariis, illesos in perpetuum permanere. Et ut huius rei concessio tam nostris quam et nostrorum successorum temporibus salua semper et inconcussa permaneat, presentem concessimus paginam duplicis sigilli nostri munimine roboratam. Anno dominice incarnationis Millesimo CC.°XX.°VIIII.° indictione II concurrente VII.^a epacta XXIII.^a Datum in Pest.

Source Fulltext: WEIS, Heiligenkreuz (=FRA II/11, 1856) S. 71-72