Uniuersa negotia, que geruntur a uiris prudentibus, ne qua possit attemptari callumpnia, poni solent in linqua testium et litterarum memoria perhennari. Sciant igitur presentes ac posteri, quoddam concambium inter nos abbatem Ulricum celle sancte Marie et dominum abbatem Heinricum domus sancte crucis esse celebratum in quadam uinea, in molendino et in pratis cum consensu utriusque capituli. Nos uero dei gratia Ulricus dictus abbas celle sancte Marie cum assensu nostrorum fratrum inibi deo et gloriose virgini militantium quoddam molendinum in ecclesia Medlicensi situm et duo prata circa terminos Minchendorf`posita, que soluunt annuatim X solidos denariorum, domui sancte crucis libere assignauimus. Ipsi uero in recompensationem quandam uineam dictam Wilreichs in Paden in monte domini ducis sitam ipsorum iure nostre ecclesie contulerunt perpetuo possidendam. Verum ne concambium nostrum aliqua in posterum impediret callumpnia, presentem paginam cum eorum nominibus, qui presenti concambio, cum fieret, afuerunt, et sigilli nostri confirmauimus firmamento. Adstiterunt enim cum fieret istud concambium, Haidenricus de Paden, Albertus de Aleht cognomine Vuslo, Eberhardus consobrinus suus, Ekehardus Gyleis, Levpoldus Canez, Wernhardus Plůtlo, Fridericus, Wichardus. Levpoldus, Fridericus, Chunradus carpentarius et alii quam plures. Actum publice in nostro capitulo incarnati uerbi anno domini nostri Millesimo CC°LVIII.° indictione prima, datum V.° kalendas Julii per manus Hainrici nostri notarii in cella sancte Marie.

Source Fulltext: WEIS, Heiligenkreuz (=FRA II/11, 1856) S. 140