Ad habendam rerum gestarum memoriam expedit ea, que geruntur in tempore, scripturarum ac testium presidiis roborari. Nouerint igitur tam presentes quam futuri, ad quos presens scriptum deuenerit vniuersi, quod ego Albertus dictus de Lachsendorf per manum utique et consensum vxoris mee Diemv^odis predia mea subscripta, videlicet dimidium mansum in Dornpach tres solidos et X. denarios soluentem, in Phaffsteten dimidium mansum tres solidos soluentem, et sex areas ibidem tres solidos et XII. denarios soluentes domino H. venerabili abbati et conuentui sancte crucis in Austria pro summa XII. librarum vendidi absque omni heredum successione, presertim cum eo tempore liberis caruerim, proprietatis titulo libere et quiete perpetuo possidenda. Et ne predicte vendicionis libertas alicuius exactione indebita uel violencia disturbetur, sed ab omni sit contradictionis materia in posterum penitus sequestrata, predicto domino H. abbati et conuentui de prediis meis quatuor librarum redditus in Pidermanstorf obligaui securita-tis ac defensionis titulo pleno iure, secundum quod modus prouincialis et iuris proprietarii debitum postulat et requirit. Vt autem hec rata et inconuulsa permaneant, presentem litteram subnotatis etiam testibus sepedicto abbati et conuentui conscribi volui sigilli mei, nec non domini Wichardi de Tribmanswinchel munimine roboratam. Testes sunt hii. Dominus Otto Tuerso, dominus Vlricus de Roer, dominus Rapoto de sancto Vito, dominus Leupoldus de Sachsengange, dominus Hadmarus de Arenstain, dominus Chunradus de Walchunschirchen, dominus Wichardus de Tribmanswinchel, et alii quam plures. Acta sunt hec anno domini Millesimo CC.°LXXV.° tercio idus Aprilis, indictione tertia.

Source Fulltext: WEIS, Heiligenkreuz (=FRA II/11, 1856) S. 195-196