Ne res gesta grandeuo tractu temporis a memoria dilabatur, expedit ea‚ que geruntur in tempore, scripturarum ac testium presidiis adiuuari. Nouerint igitur christi fideles, ad quos presens scriptum deuenerit, vniuersi, quod ego Irmfridus miles dictus de Swabdorf de quatuor mansis VI. libras mihi annuatim soluentibus, quos a domino Levtwino dicto de Werde in Haderichsdorf iure feodali possederam, domino H. venerabili abbati et conuentui sancte crucis in Austria duodecim solidorum redditus vendidi, accedente consensu et licentia ipsius domini L. de Werde, ad quem ius proprietarium spectare videbatur, quod etiam ius idem dominus L. in ipsis XII. solidorum redditibus antedicto abbati et conuentui liberaliter contulit, annuente nichilominus fauore filii mei Irinfridi, pro VII. libris denariorum wiennensis monete perpetuo possidendos. In cuius rei testimonium et cautelam presentem litteram subnotatis etiam testibus sepedicto abbati et conuentui conscribi volui, quia proprio sigillo tunc carui, sigilli domini O. de Haslowe iudicis prouincialis per Austriam nec non sigilli vniuersitatis ciuium in Prukka munimine roboratam. Testes sunt hii. Dominus O. et dominus Kadoldus filii domini O. de Haslowe, dominus H. dictus de Swarzense, dominus Eberhardus miles de Haslowe, Kalhohus, Otto, Heinricus Vbelmanni ciues in Pruka, et alii quam plures. Acta sunt hec anno domini M.°CC.°LXXVI.° (sic) IIII.° kalendas Januarii.

Source Fulltext: WEIS, Heiligenkreuz (=FRA II/11, 1856) S. 200