Uniuersis christi fidelibus presentem paginam inspecturis innotescat, quod ego Marquardus dictus de Gerewte antiquus magister cellarii de permissione uxoris mee Reihtze, liberorumque nostrorum Ulrici, Marquardi, Mehtildis, Margarete, Reihtze omniumque heredum meorum receptis a domino Heinrico venerabili abbate sancte crucis et conuentu suo duobus talentis denariorum wiennensium aream unam et uineam in Newnburg sitam, que per quendam militem dictum Vullesach, qui se in eodem loco dei seruicio mancipauit, ad predictum monasterium iure proprietario deuoluta est, de qua michi annuatim pro recto censu XLV denarii et duo pulli persoluuntur, ab omnibus aliis exactionibus, que uulgo Stewre vocantur, sev mansionariis extorsionibus, que nahtselde uel quocumque nomine censentur, liberam dimisi in perpetuum ita‚ quod quicumque memoratam aream et vineam a supradictis abbate et fratribus sancte crucis quocumque iure possederit, post solutionem prenotati census, videlicet XLV denariorum et duorum pullorum, ad nullum ulterius extraordinarium seruicium, ut premissum est, a me meisque heredibus, uel, si ipsum ius uendi per me sev meos heredes contigerit, ab alio quocumque artari possit aliqualiter, aut si artatus fuerit, non tenebitur reddere quoquo modo, excepto quod coram me stabit iudicio et placita mea iudiciaria visitabit. Promisi etiam et promitto excluso quolibet obsequio iuris aduocacionalis sepedicte aree inquilini siue coloni, me fore fidum et perpetuum defensorem. Et ut hec firma et inconuulsa permaneant, hanc litteram pro robore perpetuo conscribi iussi mei sigilli munimine confirmatam. Adfuerunt etiam huius tractatus testes, Ch. de Walchunschirchen, H. de Gottinsvelde, Dietricus de sancto loco, Ch. frater suus, Marquardus de Ha^okkingen, H. de Awe, Paltramus ante cymiterium wienne, Paltramus Vatzo, Wernherus Speismeister et alii quam plures. Actum anno domini M.°CC.°LXXVI.° feria sexta post dominicam primam quadragesime.

Source Fulltext: WEIS, Heiligenkreuz (=FRA II/11, 1856) S. 201-202