Nos Wichardus et Cadoldus de Poumgarten fratres vniuersorum notitie presentibus declaramus, quod mota iam pridem inter nos et venerabiles viros dominos Sighardum abbatem et conuentum monasterii sancte crucis questionis materia super quodam iure aduocaticio, quod nobis in quatuor laneis eorum sitis in Hedreichstorf, quos a domino Levtwino de Werda proprietatis titulo possident comparatos, asserebamus competere, tandem ipsorum permoti precibus ac zelo deuotionis inducti, manu communicata vxoris mei Wichardi dicte Brigide et filiarum mearum ex eadem genitarum minorum triennio, me Cadoldo vxorem aut liberos nondum habente pro nobis et heredibus nostris habitis et habendis libere renunciamus et cedimus omni iuri aduocaticio, iudicio, siue seruicio, quocumque nomine censeatur, quod nobis in eisdem bonis competiit, siue competere uidebatur. Constituentes nos sub ypotheca rerum nostrarum warandos ac defensores eorum contra omnes impetitores, et cauendo eis de euiccione, ac promittendo eos omnino seruare indempnes iuxta terre consuetudinem hactenus obseruatam. Confitemur etiam, nos a prefatis abbate et conuentu, quoad cessionem ipsam facilius moueremur, quatuor talenta denariorum wiennensium accepisse. In quorum omnium testimonium et robur perpetuo valiturum presens scriptum exinde conscribi et sigillorum nostrorum munimine fecimus communiri. Datum Wienne XVIII.° kalendas Februarii anno domini Millesimo ducentesimo nonagesimo.

Source Fulltext: WEIS, Heiligenkreuz (=FRA II/11, 1856) S. 261