Wir Haug vnd Hainrich brüder, genant die Thůrsen von Liechtenuels, veriæhen allen den‚ di diesen brief ansehent oder ho^erent lesen, daz der gewærft, der zwischen dem erbern manne abt Bertolde von dem heiligen crv^ece æn seite, vnd Murreln, hern Chunrads diener von Potendorf, ander Seite geschæhen ist vmb ein wæide, die derselbe Mv^orrel da zu dem Chaltengange bei Drumawe hat, mit vnser gunst vnd mit vnserm gu^eten willen geschæhen vnd ergangen ist; vnd wand diu æigenschaft desselben gutes vnd swaz der uorgenante Mv^orrel anders da hat, vnser was, daz er uon uns zu lehen hette , so hab wir dem abt und der samnunge von dem heiligen crv^ece diu æigenschaft der wæide vnd alles des, daz er da von uns zu lehen hat gehabt, lediclich aufgegeben vnd haben daz gelobt zu schermen als landes recht ist. Vnd zu widerwehsel haben wir genomen von dem abte vnd dem conuent æin halbez lehen da zu Wartperge bei Egenburch, daz alle iar dienit æin halb phunt vnd zehin phening wienner, daz sol vns auch der abt vnd die samnunge von dem heiligen crv^ece schermin als lands recht uordirt. Disen brief han ich Haug mit meinem ingesigel von vnser beder weg versigelt, wand mein bruder nicht ingesigels hette, vnd des Wechsels, der recht vnd redlich zwischen uns geschæhen ist, sint geziuch her Chunrad, her Sybot vnd her Hainrich drei bru^eder genant von Potendorf, vnd zu uorderst abt Eber uon Zwetel, vnd Otte von Rauhenek vnd Rœinprecht vnsere vettern, her Otte von Wildek, her Marquard des Chunringer ritter vnd manig ander frum man. Dirr brief ist gegeben da zu Wienn, da dirr Wechsel geschach, an sand Mathies tag, du von Christes geburt ergangen waren thausent vnd zwæi hundert, vnd vunf vnd niunzich iar.

Source Fulltext: WEIS, Heiligenkreuz (=FRA II/11, 1856) S. 279