Ego Wvluingus de Sunenberch vniuersorum tam presencium quam eciam posterorum noticie harum serie cupio fieri manifestum, quod urgente me cuiusdam iminentis michi necessitatis articulo vnum laneum situm in Wetzleinsdorf ad me proprietatis iure spectantem, in quo resident duo coloni, Albero videlicet et Chunradus, solventes de eodem ciuili iure duodecim solidos denariorum Wiennensium annuatim, et quatuor areas tres solidos seruientes, quas inhabitant Arnoldus, Albero, Heinricus pugnator et Hirzo, cum omni iuris plenitudine, usu et consuetudine, sicut michi consueuerunt annis singulis deseruiri, religiosis uiris domino Berchtoldo abbati totique conuentui monasterii sancte crucis in Austria Cisterciensis ordinis pro viginti quatuor talentis vsualis monete Wiennensis pecunie numerate vendidi, quam michi integraliter persolutam et in vtilitatem meam confiteor esse conuersam. Promittens sub ypotheca et obligacione omnium bonorum meorum tam mobilium quam inmobilium memorata bona me ipsis ab omni impeticione seu euictione seruare libera, defendere ac tueri iuxta terre consuetudinem approbatam, dansque nichillominus illustri domino meo Alberto duci Austrie, suoque pro tempore successori presentibus potestatem, quod, si processu temporis memorata bona ab ipsis abbate et conuentu per quempiam euinci contingeret, ex tunc ipse dux prefatus de possessionibus et proprietatibus meis, quas in presenti possideo uel in futurum contigerit possidere, bona seu redditus equiualentes in sufficientem reconpensam bonorum euictorum assignet eisdem, et in possessionem eorum inducat ac perpetuo defendat inductos. In cuius contractus et obligacionis mee legitime testimonium et robur perpetuo valiturum presens scriptum exinde conscriptum memoratis abbati et conuentui sigillo meo et auunculi mei domini Stephani de Meissawe tradidi comunitum, testibus contractus et obligacionis huiusmodi consciis subnotatis, qui sunt domini Berchtoldus comes de Hardekke. Meissauuarius supradictus. Vlricus de Capella. Chunradus de Pilichdorf. Hermannus de Wolfkersdorf. Otto de Haslaun. Vlricus de Wolfkersdorf et alii quam plures. Datum Wienne anno domini Millesimo ducentesimo nonagesimo quinto in crastino conuersionis beati Pauli apostoli.

Source Fulltext: WEIS, Heiligenkreuz (=FRA II/11, 1856) S. 278