Ich Margret hern Heinrichen witiwe von Hekingen dem Got gnade, vergihe vnd tvn chvnt allen den, die disen prief lesent oder ho^erent lesen, di nv lebent, vnd hernah chvnftich sint, daz der vorgenant mein wirt her Hainrich vnd avch ich mit gvtem willen vnd gvnst aller vnser Frivnde vnd avch zv der zeit, do wir iz wol getvn mohten, Vnsers rehten Pvrchrehtes daz gvt, da zv dem Tomaezleins vnd alles, daz dar zvgeho^eret, ze holtz, ze velde vnd ze dorf, iz sei gestift, oder vngestift, versvcht oder vnversucht, swi so iz genant ist, daz haben wir alles mit ainander geschaff vnd geben mit allem dem Nvtz vnd reht, als wir iz in pvrchrechtes gewer her pracht haben dvrch Got vnd durch vnsern vodern sele vnd durch vnser paider sele willen vnd hail dem Erbern Gotshavse da ze dem Hailigen Chrevtze vnd der Samnvnge gemaine; Also mit beschaidner rede, daz ich vorgenantev Margret daz vorgesprochen Pvrchrecht da ze dem Tomaezleins haben sol vntz an meinen tod; vnd nah meinem tode so sol daz éegenant Gotshavs da ze dem Hailigen Chreutze vnd die Samnvnge gemaine mit dem selben Pvrchrehte da ze dem Tomaezleins allen irn fromen schaffen verchavffen versetzen vnd geben swem si wellen an allen irresal. Iz sol avch daz vorgenant Gotshavs da ze dem Hailigen Chrevtze vnd die Samnvnge gemaine dienen alle iar an sand Jorgen tage dem Herzogen von Osterreich in seine Chammern Dreizzich wiener phenninge ze rehtem pvrchrehte von dem vorgenanten Gvte da ze dem Tomaezleins, wand er sein rechter pvrchherre ist. vnd ist sein avh rechter Scherm vnd gewer for alle Ansprache nah des landes rehte ze O^esterreich, da wir besvnderlichen sein Insigil vnd seinen prief vber haben. Vnd wande ditz geschefde vnd dise gabe mit vnser paider gvtem willen geschehen ist, Vnd wand avch ich Margret selbe niht Insigils han, da von so han ich geben dem vorgenanten Gotshavse da ze dem Hailigen Chrevtze vnd der Samnvnge gemaine disen prief ze ainem sihtigen vrchvnde vnd ze ainem offen gezivge vnd ze ainer ewigen vestnvnge diser sache versigilten mit der herren Insigil die hernah geschriben stent, di ich gebeten han, daz si ir Insigil ze ainem gezivge an disen prief gehangen hant, wand sie bei disem geschefte vnd bei diser gabe gewesen sint. Daz ist her Greiffe. her Hayme. her Otte sein prvder. her wernhart der Zolr von Radavn. her Wolfger von Awe. her Otte der Cherbecke. die alle diser gabe gezivg sint mit ir Insigiln. Vnd sint avch gezivg her Chvnrat von Praitenvelde. her Hainrich sein prvder. her Pilgreim ze den Zeiten Rihter ze Wienne. her Heinrich sein prvder. her Marchart der Zv^ent vnd ander frome levte genvch. Diser prief ist geben ze Wienne an sand Peters vnd sand Pavls tage nah Christes gebvrt In dem Drevzehenten hvndertistem Iare.

Source Fulltext: WEIS, Heiligenkreuz (=FRA II/16, 1859) S. 1-2