Ich Niclas der Esel von Pochvlies tun chunt allen den, die disen brief lesent oder horent lesen, die nu lebent vndt auh di her nah chunftig sint, daz ich ein ansprach han gehabet hintz dem Apt vnde der Samnunge ze dem heiligen crevz vm ein holtz, daz gehaizzen ist, an dem Hohe ekke, daz min vodern daz selbe holtz dem vor genanten apt vnde der Samnunge ze dem heiligen crevz verchouft hieten an min wizzen vnde an minen Willen; wan aver ich vnd mine vodern gueter levt gebet vnde Fuederunge hintz got wol bedurffen, so verceich ich mich mit verdahtem muet vnde mit ceitigem rat lauterlich durch got an disem brief der selben ansprach, vnde auh alles des rehtes, des ich vnd mine gerben haben gehabet hintz dem vor genanten apt vnd der Samnunge ze dem heiligen crevzze vm daz vorgenante holtz an dem hohekke; vnd gelobe auh an diesem brief, demselben apt vnd der Samnunge ze dem heiligen crevz daz vorgenant holtz ze schermen vu^er alle ansprach miner bru^eder. Vnde darvm, daz dise shahe vnuerwandelt vnde vnzebrohen immer ewicleih beleibe, so bestettig ichs vnde vestens mit disem brief, den ich versigelt vnde gevesten han mit minem insigel vnde mit den gezevgen di hernah geschriben stent. Datz ist her Vlrich von Wolfgersdorf der lantrichter, her alber der Stuhs von trautmansdorf. her Otte der tuers von Rauhenekke. her Otte vnd sein bruder her Rapot von Wildekke, her Weichart von arnstain. her Rapot von arnstein, her Albrech der Vovsel von Alecht, her Dietreich von Wildekke her Rudolf der Span von Gadem vnd anderer vrumer leut genuech, den dise sahhe wol chunt ist. Diser brief ist gegeben do von cristes geburt waren tausent iar drev hundert iar vnd ain iar, an sande Gregori tach des heiligen Pabst.

Source Fulltext: WEIS, Heiligenkreuz (=FRA II/16, 1859) S. 3-4