Wernhardus dei gracia Ecclesie Patauiensis Episcopus vuiuersis, ad quos presentes littere peruenerint, salutem in Domino iesu Christo. Quia persone religiose precipuum merentur habere fauorem et opera pietatis inpensa eisdem et presentis vite meritum et eterne remuneracionis faciunt premia exspectari, nos piis predecessorum nostrorum exemplis prouocati, dilectis in christo fratribus abbati et conuentui Monasterii sancte Crucis, Cisterciensis ordinis nostre dyocesis concessionem illam et graciam, quam a nostris habuerunt predecessoribus innouamus concedimus et donamus ex fauoris plenitudine, quam propter religionis sue altitudinem apud nos meruerunt habere; vt videlicet in locis Omnibus ecclesie nostre Patauiensis, tam apud Danubium, quam apud Enum. Sales, quos annuatim recipiunt, de elemosina Ecclesie Salzburgensis, videlicet duo talenta salium maioris ligaminis, quod in vulgari Shefpant dicitur, vehant et traducant libere sine muta, ita, quod nec a iudicibus nostris seu officialibus, ac mutarum nostrarum seu theloneorum exactoribus nomine mute seu thelonei, vel cuiuscumque alteris exaccionis, nichil ab eis penitus exigatur; in sortem pensionis nobis debite, quicquid de dictis salibus soluere deberent, a mutariis nostris et officialibus computandum. Volumus etiam, ut si quis de partibus Austrie vel de vectoribus salium erumdem cuiquam nostrorum subiectorum debitor existat, ratione quacumque propter hoc dictus Abbas et conuentus sancte Crucis non impediatur vllatenus vel grauetur, sed res eorum abire libere permittantur. Et vt hec nostre innouacionis concessionis et donacionis gracia iuxta antiqua ipsius Monasterii priuilegia. sigillo eciam Capituli nostri munita ab omnibus nostris officialibus prouide et integraliter observetur, presentes dedimus litteras sigilli nostri munimine roboratas. Datum wienne. anno Domini Millesimo Trecentesimo primo. kalendis Maii.

Source Fulltext: WEIS, Heiligenkreuz (=FRA II/16, 1859) S. 4-5