Ich Weihart von povngarten, Mein bruder chadolt, Mein hausvrow Vr. Breid, Mein sune Heinrich, Fridrich vnd Hertnid vnd mein tochter Getrud, Wir tvn chund allen den, die diesen brief lesent oder horent lesen, daz Wir mit gesammter hant vnd mit veraintem Willen aller unser gerben haben verchauft dreizehen Schilling pfennich gult Vnsers aigens datz hedreinsdorf, daz Wir in stiller gwer her bracht haben an allen chriek, dem erbarn abt und der Samnunge datz dem heiligen chreutz vmb vier und zwaintzich pfunt pfennig. vnd sein ovch der gewert, vnd setzen vns selbe mit alle den wir haben ze gwern vnd ze scherm vúr daz selbe gv^ot vúr alle ansprach vnd vúr allen schaden nach des landes sit vnd nach gemainem reht. Vnd geben darvber Vnsern brief ich Vorgenanter Wichart. Vnd mit mines Vetern herrn albers von Clemens insigel Versigelt dem vor genanten abt vnd der Samnunge zeiner ewigen Steticheit vnd Sicherheit des ergangen choufs. Mit den gezeingen, die hie benant sint. Daz sint die zwen Lantrichter. Her Albero Stuchs vnd herr Vlrich von Wolfkersdorf. Herr Otto von Wildek vnd her Rapot sein bruder. her Wichart von arnstein, her Levpolt von Sachsengang vnd her hertneid sein bruder, vnd anderer vrumer levt genu^ech. Ditz ist geschehen nach christes geburt vber towsent drew hundert. In dem ersten iar datz Newenburch in dem lant teiding vor sant Mertins tag des mentages.

Source Fulltext: WEIS, Heiligenkreuz (=FRA II/16, 1859) S. 5-6