Ich Rapot von Arnstain. vnd mein Hovsvrowe Jœut, verihen an disem brief allen Leuten, die in lesent oder horent lesen, di nv lebent oder hernah chumftikch sint, daz wier mit gveter betrahtung vnd gesamter hant vnd williger verhanchnusse aller unser erben, di also genant sint ,Weicharts, Gertrouten, vnd Chunegunden verchouffet haben ledigleich vnd vreilech an alle ansprach vnsers vreien aigens einen hof‚ der leit datz Winthag, pei der Swechent niderthalb des chlosters ze dem Heiligen Chreutz vnd haizzet des Goldne Hof, mit alle dev vnd dar zv^oe geho^eret, als wir in in rechter gewer besezzen haben vntz ouf diesev zeit, vnd ein Wis, dev leit ze triwanswinchel vnd haizzet dev Leimerin, dem erbern Herren Brueder Vlreich dem Abt vnd dem Conuent des vorgenanten Chlosters vmb sehs vnd Dreizzich phunt pfenninge Wienner munzz, vnd daz wir desselben gvetes schön vnd vollichleich gewert sein, also beschaidenleich, daz si daz aigen haben vnd besitzen, verchouffen oder versetzen vnd irm vrumen damit schaffen nah allem irm willen. Vnd daz dem egenanten Abt vnd seiner samnung hernah dehaines chrieges vrsache erspringen [9] muge oder gewahsen, darvmb setz ich mich der vorgenant Rapot, vnd mein housvrowe Jaeut dem vorgenanten Abt vnd seiner samnunge ze rehtem Scherme vber disen chouf nah des landes reht ze Osterreich vvr alle ansprach, vnd gib in seinen zihtigen vnd ze einem ewigen vrchunde diser sache disen brief versigelten mit meinem Rapots insigel vnd mit Weichartes insigel von Arnstain, meines geschweien, vnd mit Rapots insigel von Wildekke, mit den gezeugen di hernah geschriben sint, mit der Wizzen iz geschehen ist. Daz ist her Otto von Wildekke. her Otto der Tvrse von Ravhenekke. Ditrich von Wildekk. Her Wolfger von Ror. Otto von Ror. Dietmar von Ror. Vlrich der Matzo. vnd andere vrumer laeut genv^och. Diser brief ist geschriben. vnd gegeben, dv nah Christes gebv^oerd waren Tovsent Iar‚ Drev hundert Iar vnd darnah in dem andern Iar‚ des nahsten tages nah sant Georgen tage.

Source Fulltext: WEIS, Heiligenkreuz (=FRA II/16, 1859) S. 8-9