Ich Otte der Smidwech tvn chvnt allen den, die disen brief sehent, horent oder lesent, die nv sint vnd her nach chonftig sint, daz ich dien ein phvnt phennige an Sand Michels tag ierlichen von einem hof, der leit pei dem Smidwach, der do haizzet der Mvnich hof, dem apte von dem heiligen Chrevze vnd seinem goteshavs, daz het ich versezzen zwai iar, daz ich daz nich gedient do hed, do vragten si auf mit recht vnd wurden in wandel ertailt mit reht, vnd chlagten hintz mier vmb ir dienst vnd vmb irev wandel in der obristen Schranne. Des chom ich hintz Nevnburch vnd der erwer man her weichart von Topel vnd bruder Levpolt der chelner vnd brvder herman der chamerer von Lilinveld zv hern Georgen dem chelnner von dem heiligen chrevze, vnd ebent mich mit im vnd begab mich der Wandel an meins herren stat des aptes von dem heiligen chrevze also, daz ich in fvrwaz dienen schol ierlichen an sand michels tage, tven ich awer des niht, ich oder mein erben, so ist der vorgenant hof dem vorgenanten goteshavs ledich. Vnd daz ditze gelvbe stete beleib, so ich disen brief versigelten mit meinem insigel vnd des erwern herren hern weichartes von Topel. vnd sint des gezevge, di hie geschriben stent. Her Weichart von Topel. her Rapot von Wildek vnd her Otte sein pruder, vnd brvder Chvnrat von Lilinveld bruder Herman der chamerer ze Lilinveld. Ditze ist geschehen, do von Christes gepvrd waren tavsent iar vnd drevhvndert vnd zwei iar, nach Ostern vber acht tag enthalb ze Nevnbvrch.

Source Fulltext: WEIS, Heiligenkreuz (=FRA II/16, 1859) S. 9-10