Bonifacius episcopus seruus seruorum dei. Dilectis filiis Vniuersis Abbatibus, Abbatissis et Conuentibus ordinis Cisterciensis tam presentibus quam futuris salutem et apostolicam benedictionem. In ecclesie firmamento uester ordo nitore claro corruscans vniuersalem gregis dominici aulam illuminat et currentibus in stadio rectum iter insinuat, quo ad salutis bravium facilius peruenitur. Nuper quidem ob hoc et propter magni deuotionis affectum, quem ad nos et apostolicam sedem habetis‚ ordinem ipsum ac uos et alios eiusdem ordinis professores intima caritate prosequimur, ac sinceris affectibus excitamur, ad uestra et illorum commoda, in quibus honeste possumus, promouenda. Ideoque premissorum intuitu et obtentu dilecti filii nostri Roberti titulo sancte Pudentiane presbiteri Cardinalis, qui tamquam prefati ordinis quem professus existit promotor assiduus, necessitates uestras et dicti ordinis nobis reverenter exposuit, et super illis nostre provisionis auxilium implorauit, uobis auctoritate presentium indulgemus, ut de terris uestris cultis et incultis ad ordinem uestrum spectantibus, quas aliis concessistis uel concedetis imposterum excolendas, de quibus tamen aliquis decimas seu primitias non percepit‚ nullus a uobis seu cultoribus terrarum ipsarum aut quibuscumque aliis decimus seu primitias exigere uel extorquere presumat. Nos enim nichillominus irritum decernimus et inane, quid quid contra tenorem huiusmodi indulgentie fuerit attemptatum. Nulli ergo omnino hominum liceat, hanc paginam nostre concessionis et constitutionis infringere uel ei ausu temerario contraire. Si quis autem hoc attemptare presumpserit, indignationem omnipotentis dei et beatorum Petri et Pauli apostolorum eius se nouerit incursurum. Datum Laterani XV. Kalendas Januarii, Pontificatus nostri Anno Octavo.

Source Fulltext: WEIS, Heiligenkreuz (=FRA II/16, 1859) S. 10