Ich Johans von Losenhaim vergich an disem prief‚ daz ich ein ansprach het gegen der samnung von dem Heiligen Chraevtz vmb drev pfunt gelts datz Hoflein, di von meinem vater dar verchauft wvrden. da pin ich gaentzleich von gestanden vnd verzeich mich als des rechts, daz ich dar an het, vnd dar vber gib ich der vorgenanten Samnung vnd dem gotshaus von dem heiligen Chraevtz disen prief mit minem insigel vnd hern Chalhochs von Eberstorf, ze einem ebigen vrchund. Des sind gezevg. der Marquart der Mistelbeck. der Vlreich von Pergaw. der seifrid. vnd der vlreich pru^eder von Chranichperg, der Ortolf von Chranichperg, Vlreich der Scheuchenstainer, vnd dar zv manch pider man. Ditz ist geschehen, do von christ gebvrt ergangen waren drevzehenhundert Iar. vnd darnach in dem virden Iar.

Source Fulltext: WEIS, Heiligenkreuz (=FRA II/16, 1859) S. 15-16