Ich Rapot von Vrvar und ich Chvnigvnt sein havsvrowe wir veriehen vnd tvn chvnt allen den, di disen prief lesent oder horent lesen, die nv lebent vnd hernah chvnftlich sint, Daz wir mit vnser erben gvtem willen vnd gvnst, mit verdahtem mvte vnd mit gesamter hant zv der zeit, do wir iz wol getvn mohten, verchavft haben vnsers rechten pvrchrehtes, des wir haben gehapt von vnsern herren Apt Johanne vnd der Samnunge gemaine von dem Hailigen Chrevtze, ain halp phunt wienner phenninge geltes pvrchrehtes, daz da leit avf ainem halben lehen da ze Vlricheschirchen ze velde vnd ze dorf. Daz selbe halp phvnt geltes pvrchrehtes haben wir mit allem dem nvz vnd reht, als wir iz in pvrchrehtes gewer her pracht haben, vmb zehen phvnt wienner phenninge geben, der wir reht vnd redlichen gewert sein, dem vorgenanten Apt Johanne vnd der Samnvnge gemaine von dem Hailigen Chrevzze ledichlichen vnd vreilichen ze haben vnd allen irn frvmen da mit ze schaffen, verchauffen, versetzzen vnd geben, swem sie wellen an allen irresal. Vnd geben In dar vber disen prief zv ainem sihtigen vrchvnde vnd ze ainem offen gezevge Vnd zv ainer ewigen vestnvnge diser sache versigilten mit vnserm Insigil, Diser prief ist geben ze Wienne, do von Christes gebvrt waren ergangen Tavsent Jar, drev Hvndert Jar‚ in dem Zehenten Iar dar nah, an vnser Vrowen tage der Liehtmesse.

Source Fulltext: WEIS, Heiligenkreuz (=FRA II/16, 1859) S. 25-26