Ich hainrich vom Ror vnd Geisel min housvrowe vnd min to^ehter Margret, Chunigunt, Ofmei vnd Eufemia wir veriehen vnd tun chunt an disem brief allen den, di in lesent oder ho^erent lesen, di nu lebent vnd hernah chunftich sint, daz ein chriech ist gewesen zwischen apt Johan vnd der Samnunge von dem heiligen Chreutz ainhalb vnd min vnd miner housvrowen vnd miner chinder der vorgenanten anderhalb vmb einen hof, der weilen ist gewesen vron Diemůten der erwern altvrowen von paden; den selben chriech lazz wir gentzlich, daz wir vurbaz nimmermer dehain ansprach v^of den selben hof haben schullen. Dar vmb so hab wir von apt Johan vnd von der vorgenanten Samnung aht phunt phening wienner munzz enphangen, vnd sein der selben phening reht vnd redlich gewert. Vnd daz di geschiht stet vnd vnzebrochen beleib, wan wir selben niht insigel haben, so geb wir der vorgenanten Samnung disen brief versigelten mit der erwern heren insigel, hern Otten des Tursen von Rouheekke vnd hern Vlriches von Pergawe, den di sache wol chunt ist. Des sint geziug herman der Stor, Leupolt der wetsch, Philipp sin bruder, Chunrat der wurtz, Wernhart vor dem munich hof, Dietrich der Pienk, Leupolt der smit, vnd ander vrumer leut genuch. Ditz ist geschehen, do von Christes geburd waren Tousent iar, drev Hundert iar an dem zehenten Iar, an sant Johans tag ze sunewenden.

Source Fulltext: WEIS, Heiligenkreuz (=FRA II/16, 1859) S. 26-27