Ich Vlrich der Matz vom Ror, vnt ich Agnes sin hovsfrowe, vnd ich Chvnrat ir svn, vnt ich Margaret ir tohter wir ve^eriehen vnt tvn chvnt allen den, di disen brief sehent lesen oder horent lesen, di nv lebent vnt her noch chvnftikh sint, Daz wir mit verdahten mv^ot vnt mit gv^otlichen willen vnt mit aller vnser erben gv^otlichen willen haben geben hintz dem Heiligem Chrevtze vnt gewidemt ewichlichen vnsers rehten aigens, einen Weingarten vnt einen acker, die da haizzent bi namen Gebrait, vnt ligent an dem velde zwishen pfafstetten vnd des Rors Mvl, Mit allem dem reht, vnt wirz gehabt haben, vnt allen iren frvmen damit zeshaffen. Vnt habent si vns dar vmbe gegeben sechs pfvnd pfenning wienner mvnz, der wir reht vnt redlich gewert sin. Daz di rede stet si vnt daz gelvbde vnzebrochen, Dar vber so gib ich vorgenanter Vlrich der Matz den herren vnt der Samnvnge vom Heiligen Chrevtze disen brief ze einem vrchvnde vnt ze einem gezevkh vnt ze einer Festvnge diser sache versigelt mit minem insigel vnt mit herrn Otten insigel des Tvrsen, der diser sache gezevkh ist. Des sint ovch gezevge, her Wolfker vom Ror, her Otte sin brvder, her Dietmar ir brv^oder, Herr Alber von Paden, Hainrich der Riedmarcher, Marchart sin brv^oder, Ortolf vom Ror, Hainrich der Pater von Lestorf, vnt ander frvm Levte genv^okh, den dise sache wol chvnt ist. Der brief ist geben datz Paden, do von Christes gebvrt waren ergangen Tovsent iar, Drev hundert iar, dar noch im zehenten iar, An sant Jacobs tagkh, im Snit.

Source Fulltext: WEIS, Heiligenkreuz (=FRA II/16, 1859) S. 27