Ich Alber genant von dem Stain datz Paden vnd mein Hovsvrowe Elspet veriehen an disem prief vnd tv^oen chunt allen laeuten, di in sehent, lesent oder horent lesen, di nu lebent oder hernah chumftich sint, daz wir mit gvetleichem willen vnd wol verdahtem mv^oet vnd mit gesamter hant vnd mit gv^oeter gunst aller vnserr nahsten vreunt, di wir hie benennen, Daz ist vro Diemůet mein Albers mv^oeter vnd Dietreich mein vnd meiner housvrowen der vorgenanten Elspeten svn vnd Chunegunden vnser baider to^echter vnd Elspeten vnd mein Albers swester Gerdrouten vnd Diemv^oeten vnd alle anderr vnserr vreunt reht vnd redleich verchouffet haben vnser hous vnd Hof datz Baden, der da gelegen ist bei dem Mvnichhof datz Paden, Der Samnung von dem Hailigen Chraeutz: mit allev dev vnd darzv^oe geho^ert, mit allem dem nutz vnd reht vnd wier in herpracht haben in rehter aigens gewer vntz ouf dis Zeit, vnd ze den Zeiten, dv wier iz wol getven mochten, ze ver chouffen, ze ver setzen vnd allen iern nutz vnd frumen da mit ze schaffen an ierrsal aller laeut vmb viertzich phunt wienner phenning. Vnd sein ouch der vollichleich vnd scho^en gewert. Wand auer dev vorgenant Samnung sorgen het vnd wider saz, daz mein Albers swester Diemv^ot ze den zeiten inner landes niht was, noh bei disem chouff gegenwertich moht gesein, dar vmb nach frumer laeut rat‚ den diser chouf chunt ist, setze wier vnsern Weingarten, der da haizzet der Hager, der da halber ist meiner mveter der vor genanten Diemveten vntz an ier tot, vnd fvrbaz gaentzleich ouf mich erbet, der da lait ze paden, vor di ansprach meiner swester vnd vor alle ansprach nah des landes reht ze Ostereich. Vnd daz diser chovf staet beleib vnd vnverwandelt, dar vber geb wier disen prief ze einem offenn vrchunde versigelten mit hern Otten insigel des Tversen von Rouhenekk vnd hern Dietmars insigel von dem Ror vnd hern Heinrichs insigel von Paden, di des selben chouffes gezeug vnd vrchund sind vnd mit mein saelbes insigel, vnd mit den gezeugen‚ die hie benant sint. Her Vlreich der Matz, Her Wolfger von dem Ror vnd her Ott sein Brv^oeder‚ Her Haidenreich von Taehenstain, Her Alber von Paden, Herman der Star vnd ander frume laeut genůch. Der chouff ist geschehen vnd der prief gegeben, dv von christes gebv^oerd ergangen waren Tovsent Iar, Drevhundert Iar, vnd da nah in dem ainleften Iar, an sand Pauls tag vor der Lichtmesse.

Source Fulltext: WEIS, Heiligenkreuz (=FRA II/16, 1859) S. 28-29