Ich Laurentz der Holtzer von Paden vergih vnd tůn chunt an disem brief allen den, di in lesent oder horent lesen, daz ich mit verdahtem muet vnd mit zeitigem rat vnd mit gůtem willen miner hosvrowen Elspeten vnd miner sune Vlriches vnd Vlriches vnd miner tohter Chunigunten verchouffet han einen hof daz Paden, der ist gelegen bei heiligchreutzer munichhof, den ze Purchreht hat Chunrat der hantlos vnd da von dienet aller iar ein halb phunt phenninge zwier in dem iar, sehzich phenninge ze sant Georgen tach vnd sehzich phenning an sant Mychelz tach‚ apt Johan vnd der Samnung datz dem heiligen Chreutz vmb nevn phunt phenning Wienner munzze, vnd des selben gůtes pin ich reht vnd redlich gewert‚ in ze verchouffen, ze versetzen vnd allen iren vrum da mit ze schaffen mit allem dem reht, vnd ich den selben hof in gewer vnd in gewalt her han braht, wan er min rehtez aigen vnd mit vurziht getailtez aigen ist gewesen. Dar vmb so setz ich mich ze scherm vur alle ansprach vber den selben hof der vorgenanten samnunge nah des landes sit ze o^esterich. Vnd daz diser chouf stet vnd vnzebrochen beleib, dar vmb so gib ich der vorgenanten samnunge disen brief versigelten mit min Laurentzen insigel. Des sint geziuch Hainrich von Sultz, Reinpreht von Sullz, Haidenrich Tehenstainer, Wernhart der rihter von Dreschirchen, Herman der Stor, Livpolt der Wetsch, Chunrat vuder weins vnd ander vrumer laeut genůch. Diser bief ist gegeben do von christes gebůrd waren Tousent iar drev hundert iar dar nah in dem zwelftem iar, des nehsten mentages in der phingest wochen.

Source Fulltext: WEIS, Heiligenkreuz (=FRA II/16, 1859) S. 36-37