Ich vrowe Jeute herrn Cyriuas hausfrawe von Merswanch tuen chunt an disem prief allen den, di in lesent oder horent lesen, daz ich mit guetem willen meines herrn herrn Cyriuas vnd mit meiner sv^en herrn Jansen vnd herrn Vlreichs vnd ander meiner frevnt, ze den zeiten, vnd ich ez wol getuen macht, geschaft han den Erbern herrn pruder Johann dem apt ze dem heiligen Chreutz vnd der Samnung einen weingarten, der leit an der winder altem perge, den ich han gechouft von einem meiner diener, der do hiez Tiem vnd sein hausfrawe Chunigunt, um zwelif phunt wienner pheninge. vnd het vm selbe phennig verchauft ein ander gut meins an erstarbens eribs von vater vnd von mueter vnd han in den aufgegeben vor der Rechten perch herren nach aigens gewere vnd nach periges reht, vnd habent mir di vorgenanten herren den vorgenanten Weingarten verliechen ze meine Lebtagen vnd zve mein aines leipgedinge von ierr hant also beschaidenleichen, daz sev mir lobent vnd sich pintent, swan der vorgenante weingarten ledich wird vnd in ir gewalt chumt, daz man dienen schol dem Conuent auf dem tische zwai phunt phenning, vnd da von schol man geben zwai stuch vische dem Conuent ze trost an sand Georii tag, vnd des selben tages schullen sei ierleichen meinen Iar tag pegen mit vigilii mit messe vnd mit anderm gepet, zegleicher weis als mein Leichnam gegen wurtich wer, vnd schullen auch gedenchen meines herrn herrn Cyriuas, vnd vnserer chint vnd vnser paider vater vnd mueter vnd schullen auch, ob ich so arm wurd vor meinen tod, daz ich der fuer nicht gehaben mecht, meinen leichnam nemen, swo ich stirb in dem lant, vnd fueren hintz dem Heiligen Chrevtz in ir chost vnd da pestatten. Vnd swan daz vor genant gelub von irrer saumnung verhabt wure an erhaft not, so schullen sich meine nesten gerben ziehen zve dem weingarten, vnd daz ez werd gepezert vnd swer des gescheftes gegenwurtiger vollaist ist, dem scholl man geben ein chophel vnd ainen lebzelten oder etzwas anders ze einen ewigen vrchunde vnd daz daz stet beleib daruber vbergib ich in in disen prief versigelten mit meines herrn herrn Cyriuas insigel vnd mit meines svns herrn Jansen insigel. Daz ist geschehen do von Christes purd waren drevzehenhundert iar dar nach in dem zweliften Iar.

Source Fulltext: WEIS, Heiligenkreuz (=FRA II/16, 1859) S. 39-40