Ich Wernhart von Schowenberch vergich vnd tun chunt an disem brief allen den, di in lesent oder ho^erent lesen, di nu lebent vnd her nach chumftich sint, daz ich mit gu^etem willen vnd mit verdahtem mu^et, vnd mit zeitigen rat durch aller miner vordern vnd durch miner sel willen han gegeben der erwern Samnunge datz dem heiligen Chreutz auf vier lehen zwen vnd dreizzich ches vnd sehzehen hu^ener weiset, vnd die vogtei dotz Gnadendorf mit allem reht, daz ich gehabt vnd gechouft han von hern Heinrichen von liehtenstain, des di selb erb vogtei ist gewesen dotz Gnadendorf an dem Leizzeperg, vnd setz mich der vorgenanten Samnunge vber daz selbe gu^et vnd vogtei ze scherm vur alle ansprach nah des Landes sit ze Osterrich. Vnd daz ditz selgeret vnd disiv gab stet vnd vnzebrochen beleib, dar vmb‚ so gib ich der vo^ergenanten Samnunge disen brief versigelten mit min Wernharts insigel. Diser brief ist gegeben do von Christes gebu^erd waren Tousent iar, drev hundert iar, in dem zwelften iar, an sant veits tach.

Source Fulltext: WEIS, Heiligenkreuz (=FRA II/16, 1859) S. 37