Ich Ruedolf von Ewerstorf Chamrer in Osterreich vnd ich Reimprecht sein prveder vergehen des an disem prief, Daz der Erber man her Jordan van Wienne chevft hat den Hof datz Reinhartstorf van heren Haidenreihen van Tehenstain vnd van seiner Havsvroeven ver Ofmein mit alle dem recht, als sen gehabt habent, also beschaidenleichen, Daz der vorgenant her Jordan von dem vorgenantem hof vns Dienen sol alle Iar an sant Michels tach vreis purchrehtes zwelf pfeninge Wienner mvnze Vnd anders niht mit alle dem recht, als pvrchrecht recht ist. Daz diese rede stet sei vnd gantze beleibe diser sache, Geb wir in disen prief versiegelte mit vnsern Insigeln Vnd mit den erwern gezevgen, die pei diser sache gewesen sint. Her Marchart von Mistelbach, Her Fridreich von Steyr, Her Vlreich bei den Minnern prvedern, Her Herman pfarrer van Chirchperch, Her Levpold van Sand Margreten, Her Rv^odolf pfarrer ze Eberstorf, Her Chvnrat der Jvnge, Her Nyclas pvrger Maister ze Wienne, Her Otte sein prveder, Her Dyepolt von Metten, Her Stephan der Chrigler, Her Hainreih der schveler, Her Chvnrat der pomernvz vnd Seifrit der Smit Vnd ander frvm levt genv^och. Dieser prief ist geben ze wienne, Do van Christes gebv^ort waren ergangen Dreytzehen hvndert Iar, In dem Drevtzechenten Iar, Nach Sand Gregori tach, Des pfinztages.

Source Fulltext: WEIS, Heiligenkreuz (=FRA II/16, 1859) S. 40