Ich Herman von Welmerdorf tv^on chund an disem prief allen den, di in sehent oder horent lesen, Daz ich mit gutem Willen miner Hovsvrowe Perhten ain gut an der wegschaiden pei Schachen ob Schevfling gelegen, daz mein erbe aigen ist, vnd gilt ain march phenning, gesuecht vnd vngesucht, gepowen vnd vngepowen auf gigeben vnd geantwurt han dem erbern heren apt Johan vnd der Samnunge des goteshaus ze dem Heiligem Chrevtz datz Ostereih, Mit solher beschaidenheit daz si vnser paider sel, mein vnd miner hovsvrowen der vorgenanten ewichleichen schullen gedenchen vnd got vmb vns pitten. Vnd haben daz getan mit solicher auzgenomer red vnd gelübe, daz ich Hermann vnd mein hovsvrow percht di vorgenant den nv^otz ab dem vorgenanten gut unz an vnser baider tode selben nemen vnd haben schullen vnd swenne vnser ains abstirbet, so ist ain halbe march ledich, Swenne aber wir baide nicht ensein, so schol di march gentzleih ledich sein. Vnd durch vnser trewen vnd auch lieb willen, di wir haben getan dem vorgenanten hovs ze dem heiligen Chreutz mit dem genanten geschefte, So habent vns die egenanten herren apt Johan vnd di samnunge des selben hous di genade getan, daz wir schulen habn ir haus, daz gelegen ist ze Judenburch, inne haben ze leibgedinge vntz an vnser paider tod, vnd schullen auch ez verwesen mit stewer vnd mit pezzerung vnd mit allen dem, daz das hous anget oder anweiget, vntz an vnsern tod vnd sol nah vnserm tod wider angevallen daz vorgenant goteshouz ze dem Heiligen Chreutz. Vnd daz ditz gescheft vnd selgeret vest vnd ewig beleibe, so gib ich vorgenanter Herman dar vber disen prief den vorgenanten heren ze dem Heiligen Chreutz ze ainem ewigen gezeug versigelten mit Hermans ynsigel des Richters ze Judenburch ze den zeiten, vnd mit Ditmars ynsigel von Reifenstain, wand ich selber niht ynsigels han. Darzv sint des gezeuge, herr Herbort vnd Herman di Pfaffendorfer, Hainreich von Stretwick. Gerunch van awen. Dietreich vnd Jaecel- vnd Philippe di Hohenstainer, Nyclos der Zaech, Hainreih der Greuzer vnd ander erber leut genuch. Daz ist geschehen ze Judenburch nach Christes gepurd vber dreuzehenhundert Iar dar nach in dem fvmzehenten Iar, an dem dritten tage nach dem Perhtage.

Source Fulltext: WEIS, Heiligenkreuz (=FRA II/16, 1859) S. 42-43