Fridericus Dei gracia Romanorum Rex semper Augustus Vniuersis Sacri Romani Imperii fidelibus et specialiter . . Iudici . . Juratis et Ciuibus Posoniensibus, nec non aliis quibuscumque presentes litteras inspecturis, graciam suam et omne bonum. Gratum deo et acceptabile impendisse obsequium arbitramur, dum personas Ecclesiasticas in suis confouemus Juribus et ea ipsis ab aliis facimus conservari. Eapropter Uniuersitati Vestre presentibus declaramus, quod attendentes benigne celebis uite preconium, quo Honorabiles et Religiosi viri . . Abbas et Conuentus Monasterii Sancte Crucis, Ordinis Cysterciensis Patauiensis dyocesis nostri dilecti deuoti diuinis insistentes laudibus commendantur; Nec non fidem ac deuotionem, quibus se ijdem nostris Progenitoribus, Illustribus Austrie et Styrie ducibus, hucusque ac nobis gratos reddiderunt multiformiter et acceptos. Omnia priuilegia, Jura, Libertates et gracias Ipsis Suoque Monasterio predicto, a Magnifico Principe Domino Karolo, Vngarie Rege, fratre nostro Carissimo concessas, traditas et indultas, sev etiam confirmatas nostro, fratrumque nostrorum Carissimorum . . Ducum Austrie, auctoritate ac nomine approbamus. Mandantes vobis vniuersis et singulis firmiter et districte nostre gratie sub obtentu, Ne quis ipsos, Abbatem, Conuentum et Monasterium Sancte Crucis in premissis molestet aliqualiter vel perturbet. Specialiter vero per vos, Ciues Posonienses, predicti Monasterii Jura in omnibus suis conscriptis volumus articulis inuiolabiliter conseruari, sicut indignationem nostram fratrumque nostrorum . . Ducum Austrie ac Heredum nostrorum grauissimam volueritis euitare. In cuius Rei testimonium presentes litteras scribi et nostre maiestatis Sigillo iussimus communiri. Datum in Castris ante Gumaren VIII° Idus Octobris, Anno domini Millesimo Trecentesimo Decimo septimo, Regni vero nostri anno Tercio.

Source Fulltext: WEIS, Heiligenkreuz (=FRA II/16, 1859) S. 51-52