Ich Cecilia hern Albers wittiwe von Paden dem Got gnade, vergihe vnd tun chunt allen den, die diesen prief lesent oder horent lesen, di nv lebent vnd hernach chunftich sint, daz mein wirt, der vorgenant her Alber von paden mit meinem guten willen vnd gunst vnd ander seiner erben mit verdahtem mvte vnd zv der Zeit, do er iz wol getun mochte, lauterlichen durch got vnd dur siner vodern sele willen vnd auch durch vnser payder sele hayl geschaffet hat sines rechten anerstorben erb aigens vier phunt wienner phenninge geltes, die da ligent avf weingarten‚ die da gelegen sint enhalben der Swechent, avf dem Harde hin zv dem Hayligen Chrevtzze, zv ainem rechten Selgeraete, daz man sinen Jartag aller iaerchlichen da von bege also, daz man der Samnvnge gemaine alle iar an sand Margreten tage gebe ainem ieglichen pruder Zway stuke wische, ain Semeln vnd wein dar vmbe, daz sie vnser paider sele vnd aller glavbigen sele dester vleizchlicher gedenchen mit gebet, mit vigilien ||
vnd mit Selmessen ze gleicher wise, sam vnser leichname ze gegenwvrte stvende. Daz ditz geschefde furbaz ewichlichen staet vnd vnzerbrochen beleibe, vnd wand mein wirt der vorgenant her Alber von Paden gestorben ist vnd daz geschefde niht bestätiget ist bei seinem lebentigem leibe da von, daz man sein Insigil Im Jamer gaehe nach sinem tode ze prach, vnd avch ich Cecilie selber niht aigens Insigils han, da von so gib ich dem vorgenanten Chloster da zv dem Hayligen Chrevtzze vnd der Samnunge gemaine da selbens vnd allen irn nach chomen disen prief zv ainem sichtigen vrchvnde vnd zv ainem waren gezevge vnd zv ainer ewigen vestnvnge diser sache versigilten mit siner naehisten frivnde Insigiln, hern Vlriches von Pergawe, hern Irnvrides von Echartesawe, hern Otten des Turssen von Ruhenecke, hern Otten von Echartsawe, hern Hainriches des Perner, vnd mit hern Vlrichs Insigel des vorgenanten hern Vlriches svn von Pergawe, die diser sache gezevg sint mit ir Insigiln. Vnd sint avch gezevg her Hainrich der Padner, her Haidenreich von Taehenstain vnd ander frume levte genvch, den ditz geschefde wol chvnt ist. Diser prief ist geben ze Wienn, do von Christes geburt waren ergangen Dreuzehen Hundert Iar. In dem Siebenzehenten Iare darnach, an sand Nichlas tage.

Source Fulltext: WEIS, Heiligenkreuz (=FRA II/16, 1859) S. 52-53