KAROlus dei gratia Hungarie, Dalmatie, Croatie, Rame, Seruie, Gallicie, Lodomerie, Cumanie, Bulgarieque Rex, Omnibus christi fidelibus tam presentibus quam futuris presentem paginam inspecturis salutem in omnium salvatore. Cum a nobis petitur, quod iustum et honestum est, decet maiestatem Regiam facilem prebere consensum in hiis precipue, que diuinis rebus religionisque cultui uidentur utiliter conuenire. Proinde ad vniuersorum notitiam harum serie litterarum volumus pervenire, quod vir Religiosus frater Corrardus procurator domus seu Curie Neunaigen dicte iuxta fluuium Fertow existentis, que est grangia ecclesie sancte CRVcis de austria Pathauiensis dyocesis, ordinis Cysterciensis, ad nostre maiestatis accedens presentiam sua nobis querulosa propositione demonstrauit, quod eadem domus seu grangia per exercitum et descensum nostrum, quem prope Mvsun habuimus et fecimus, dampna non modica perpessa extitisset, in quorum quidem dampnorum reconpensationem quandam terram castri nostri Musuniensis Zechun vocatam, nostre collationi pertinentem, ut dixerunt, a nobis eidem ecclesie dari et conferri humiliter supplicando postulavit. Nos igitur petitionibus eiusdem fratris Corrardi pie et fauorabiliter inclinati predictam terram Zechun vocatam vacuam et habitatoribus destitutam cum terris arabilibus, nemoribus seu frutetis ac alijs utilitatibus suis vniuersis, Cui quidem terre a parte orientali terra Zaraan dicta, a meridie vero terra Galus nuncaputa, a parte vero occidentali terra eiusdem domus sancte CRVcis vicinari dicuntur, turn ob deuotionem, quam more aliorum Regum progenitorum nostrorum deo deuotorum erga eandem ecclesiam sancte CRVcis specialiter gerimus, tum etiam in satisfactionem et reconpensationem dampnorum predicte domui per exercitum nostrum eidem irrogatorum eidem ecclesie sancte CRVcis et domui Neunangn antedicte dedimus, donauimus eo iure, quo nostre Regie collationi pertinere dinoscitur, perpetuo possidendam, tenendam et habendam sine preiudicio iuris alieni, a Judicio et Jurisdictione Comitum de Musunio pro tempore constitutorum ipsam terram penitus eximentes. IN cuius rei memoriam firmitatemque perpetuam presentes concessimus litteras nostras duplicis sigilli nostri munimine roboratas. Datum per manus discreti viri magistri Johannis Albensis ecclesie Prepositi, aule nostre vicecancellarii et archidiaconi Kukulliensis dilecti et fidelis nostri, anno domini Millesimo CCC° decimo octauo, X°VI°. kalendas Octobris, Regni autem nostri anno similiter decimo octauo.

Source Fulltext: WEIS, Heiligenkreuz (=FRA II/16, 1859) S. 53-54