Ich Weichart von Arenstain vnd ich Agnes sein Hovsvro^ew wir veriehen vnd tun chunt allen den, die disen prief lesent oder horent lesen, die nv lebent vnd hernah chvnftig werdent, daz wir mit gesampter hant vnd mit verdahtem muet, ze der zeit, do wir ez wol getun mohten, vnd mit vnser erben gutem willen, die also sint genant, Kathrey vnser tohter, Alber, Otto, Hadmar, Weichart vnsere sune vnd mit andern vnsern vreunt rat vnd willen verchovffet habn vnsers rehten erbe gutes, ainen hof, der genant ist des Altmans hof, der da leit bei Arenstain, mit allem dem, daz darzu gehoret ze veld ze holcz, versuecht oder vnversuecht, swie so daz genant sey, vnd auh waid, als vil der hof bedarf, vberal avf vnsern aigen, vmb fiumf vnd sehzig phvnt phenning wienner muncze, der wir reht vnd red-lih vnd ganczlih gewert sein, dem erbaern mann Levtolden ab dem Bihtsteig vnd seiner hovsvrowen vron Levkarden vnd allen irn erben furbaz ledichlich vnd vreilich ze haben vnd allen irn vrum do mit ze schaffen, ze verchovffen‚ ze versezzen vnd avh geben, swem sie wellen an allen irresal vnd durh pezzer sicherhait sezzen wir vns mit sampt vnsern erben, die vorgenant sint, vber den vorgenanten hof vnd swaz dar zu geho^eret, dem vorgenanten Levtolden vnd seiner hovsvrowe vron Levkarden vnd avh iren erben ze rehtem scherm vnd gewer fur alle ansprach nah des Landes reht ze Osterreih. Dar vber durh der liebe vnd andaht vnd genaden willen, die wir habn vnd auh immer habn wellen zv dem hovs vnd auh zv der samnunge der herren ze dem heiligen Chreutz vnd auh durh vnser sel hail willen vnd aller vnser vodern geben wir demselben hovs vnd der Samnunge die aigenschaft des vorgenanten hoves mit allem dem reht, vnd wir sev gehabt habn vnd vnsere vodern. Vnd zv ainem vrchunt, daz die aigenschaft ir sei ledichlich, so sol man in dienen ierichlich an sant Michels tage van dem oftgenanten hof vierzig phennig wienner mvnzze, vnd geben in darvber disen prief ze ainem offen urchund vnd ze ainem gezevg vnd vestigvnge ditz chovffes vnd diser sache, versigilten mit vnserm ynsigel, vnd mit hern Dytreihs ynsigel van Pilhdorf, ze den zeiten Marschalh in Ostereih, mit hern Otten ynsigel des Tursen, vnd mit hern Hadmars ynsigel des Stuhsen, ze den zeiten Vogt der herren ze dem heiligen Chrevtz. Diser prief ist gegeben nah Christes gepurde vber Tavsent iar Drevhundert iar, dar nah in dem nevnczehenden iar, ze vnser vrowen Misse ze der lihtmisse.

Source Fulltext: WEIS, Heiligenkreuz (=FRA II/16, 1859) S. 57-58