Ich Marchart von Mistelbach Vnd ich Reichgart sein hausvrowe, Wir veriehen vnd tun chunt allen den, die diesen prief lesent oder horent lesen, di nu lebent vnd hernach chunftich sint, Daz wir mit vnser paider erben gutem willen vnd gunst, mit verdachtem mvte vnd mit gesamter hant, zu der zeit, do wir ez wol getun mochten, Vnd nach unser paider friunde Rat verchavft haben vnsers rechten chauf aigens, ainen hof, der da leit ze Haedrichesdorf bei Poysdorf vnd alles, daz dar zu gehoret vnd swaz wir dar über in dem selben dorf gehapt haben vnd dar umbe, ez sei aigen oder von vns verlehent, daz zu vnser aigenschaft da ze Haedrichesdorf gehoret, ez sei in vrbar, ze holtz, ze velde vnd ze dorf, gestift oder vngestift, versucht oder vnversucht, swie so daz genant ist. Daz selbe vorgenant gut alles vnd alles daz recht, daz wir an dem gerichte in dem selben dorf Haedrichesdorf gehapt haben, daz haben wir allessamt geben mit allen dem nvtz vnd recht, als wir ez in aigens gewer har pracht haben, vmb zway hundert phunt vnd vmbe zehen phunt Wiener phenninge, der wir recht vnd redlichen gewert sein, dem erbern herren apt Otten vnd der Samnunge gemaine von dem Hailigen chrevtzze lediglichen vnd vreilichen ze haben vnd allen irn frumen da mit zeschaffen, verchavffen versetzzen vnd geben, swem si wellen an allen irresal. Vnd dar vber zv ainer pezzern Sicherheit so setzsen wir vns ich Marchart von Mistelbach, vnd ich Reichgart sein havsvrowe vnd ich Marchart vnd ich Hadmar des vorgenanten hern Marchartes svne vnverschaidenlichen dem vorgenanten vnserm Herren apt Otten vnd der Samnvnge gemaine von dem hailigen chrevtzze vnd allen irn nachchomen vber daz vorgenant gut da ze Haedrichesdorf bei Poystorf ze rechtem scherme fur alle ansprache, als aigens recht ist vnd des landes recht ze Osterreiche, vnd geben in dar vber disen prief zv ainem sichtigen vrchunde vnd zv ainem waren gezevge vnd ze ainer ewigen vestnunge diser sache versigilten mit vnsern Insigiln vnd mit hern Dietriches Insigil von Pilichdorf, zv den zeiten Marschalch vnd mit Albers Insigil von Ravhenstain, vnd mit Hadmares Insigil des Stuchssen, der zv den zeiten der vorgenanten herren vogt was, vnd die dieser sache gezevg sint mit irn Insigeln, vnd ander frume levte genvch. Diser prief ist geben ze Wienne, do von Christes geburt waren ergangen Drevzehen Hundert Iar in dem Nevnzehenten Iare dar nach, an vnser vrowen tage der Liechtmesse.

Source Fulltext: WEIS, Heiligenkreuz (=FRA II/16, 1859) S. 56-57