Ich Albrecht des Mvndleins diener ze Wienne vergich vnd tvn chvnt allen den, die disen prief lesent oder hoerent lesen, die nv lebent vnd hernach chvnftig sint, daz ich chom fvr die erbern herren prveder Otten ze den Zeiten Apt vnd di Samnvnge datz dem heiligen Chrevtz vnd pat sev fleizzichleich durch got vnd in got, daz si mir ain pfrvent geben in irm Spitale daz dem heiligen Chrevtz, di habent si mir geben lavterleich dvrch got vntzen an meinen tode. Nv han ich vorgenanter Albrecht von der lieb vnd durch die andaht, di ich han zv got vnd dem heiligen Chrevtz, geben tzehen phvnt wienner phenninge lautterleich dvrch got in daz vorgenant Spitale in dem Iare, do ich mich der pfrvent underwant. Dar zu han ich avch geschaft vnd geben dvrch got vnd dvrch mein selber sele hail mit guettem willen vnd gvnst, mit verdahtem mvet, zv der zeit, do ich ez wol getvn maht, vnd mit meins perchmaisters hant Chvnrades von Grinzing ainen weingarten, der da leit in dem Chrotenpache, zenäst pei Chvnrades des Roraer des vorsprechen weingarten, des ain viertail ist vnd den ich gechauft han wider Jacoben von der ygla, dem got gnade, in das egenant Spital also mit auzgenomner rede‚ daz ich vorgenanter Albrecht den egesprochen weingarten sol verrihten mit allen pawen und sol in auch nvtzen vnd inehaben vntzen an meinen tode, vnd nach meinem tode sol sich der Spitalmaister datz dem heiligen Chrevtz, oder swer an seiner stat ist, des vorgenanten weingarten vnderwinden, allen seinen frvmen da mit ze schaffen, verchauffen, versetzen vnd geben swem er welle an allen irresal. Vnd wand ich Albrecht nicht aigens Insigils han, da von geb ich den egenanten Herren Apt Otten vnd der Samnvng vnd dem Spital datz dem heiligen Chreutz disen prief zv ainem sichtigen vrchvnd, zv ainem waren gezeug, vnd zv ainer staeten vestnung diser sache, versigilten mit meins perchmaisters Insigil Chvnrades von Grintzing vnd mit hern Jacobes des Scheuchen Insigil vnd mit Jacobes des Maeserleins Insigil, die diser sache gezeug sint mit ir Insigiln. vnd sint auch des gezevg, prveder Thoman ze den zeiten Hofmaister ze Wienne, prveder Seifrid ze den zeiten Chamerer datz dem heiligen chrevtz, Jacob der Mvndel, vnd ander frvm levte genveg. Diser prief ist geben ze Wienne, do von Christes gebvrt waren ergangen Drevtzehen Hvndert iar, in dem ainem vnd tzwaintzkistem Iar — darnach an dem auffart tag.

Source Fulltext: WEIS, Heiligenkreuz (=FRA II/16, 1859) S. 67-68