Ich Ernprecht von Gumpolteschirichen vergihe vnd tvn chunt allen den die disen prief lesent oder horent lesen, die nv lebent vnd her nach chunftich sint, daz ich mit willen vnd gunst meiner hausvrowen vron Geiseln vnd ander meiner erben mit verdachtem mvt vnd nach meiner pesten frevnde Rat geschaft han mein geschefte zv der zeit, do ich iz wol getvn mochte nach meiner sele gewarhait, dar vmb daz mein hausvrowe, die vorgenant vro Geysel vnd ander mein erben nach meinem tode an chriege beleiben. Des allerersten so han ich geschaft vnd schaffe lauterlichen durch got vnd durch meiner vodern sele willen vnd auch durch meiner selber sele hail den erbern prvedern prveder Otten zv den zeiten apt vnd der Samenvnge gemayn datz dem heiligen chrevze vnd allen irn nachchomen mein haus, daz da leit vor dem ziegel hove pei vron Benditten haus vnd daz ee gedient hat vnd noch dient alle iar der vorgenanten Samenvnge von dem heiligen chrevtz Sechs Schillinge wienner phenninge ze rechtem purchrecht vnd ze grvntrecht vnd dient hintz sand Jacob den swestern ayn phunt phenninge purchrechtes. Dar zv so han ich in geschaft vnd schaffe in meinen weingarten, der da leit ze Gumpolteschirichen avf der nidem Staingrveb, zwischen Hainriches weingarten des Esler vnd Otten weingarten des Chelner. Den selben weingarten vnd das vorgenant havse han ich Ernprecht geschaft der vorgenanten Samnvnge daz dem heiligen Chrevze, Aso mit auz genommer rede, swanne daz ist, daz ich tot gelige vnd swo ich tot gelige, do suln sie mich nemen mit irn wagen vnd suln mich zv irm chlo^ester fuern vnd suln mich da bestatten mit gepet mit vigili vnd mit selemessen, als ir gewonhait ist ze gleicher weis, als irr prveder aynen vnd suln sich des vorgenanten hauses vnd des weingarten nach meinem tode vreilichen vnderwinden vnd suln do von alle iar an meinem iar tage der Samenvnge aynen gantzen dienst geben, als ir gewonhait ist, daz sie meiner sele vnd aller gelaubigen sele desder vleizichlicher mit gepet vnd mit vigili vnd mit selemessen gedenchen. Vnd sweliches iar sie des nicht entvnt, so suln sich die naesten mein frevnde paide des weingarten vnd des hauses mit irm gutem willen vnderwinden vnd suln die also lange inne haben, vntz daz der dienst gar vnd gentzlichen wider ton werde. Si suln auch meiner havsvrowen in dem selben havs aynen gemach lazzen, der ir zimlich sei, ob si ane man beleibet. Daz dise rede vnd ditz gescheft furbaz zwischen vns paidenthalben stet vnd vnzebrochen beleibe vnd wand ich Ernprecht nicht aigens insigils han, do von so han ich geben dem vorgenabten prveder Otten, zv den zeiten apt vnd der samenvnge gemayn datz dem heiligen chrevze vnd allen irn noch chomen disen prief zv aynem sichtigen vrchunde vnd ze aynem offen gezevg vnd zv ayner Ewigen vestnvng diser sache vnd ditz gescheftes versigilten mit hern Chvnrades Insigil des Chyburger, ze den zeiten obrister chellermaister der hohen fürsten in Osterriche vnd mit hern Otten insigil des Wulfleinstorfer, zv den zeiten purger maister ze wienne vnd mit hern Nichlas insigil des Pollen, die diser sache gezevge sint mit ir insigiln vnd ander frvm levte genvch. Diser prief ist geben ze wienne, do von Christes geburt warn ergangen drevzehen hundert iar in dem zwai vnd zwentzzigistem iare dar nach, an sand Jorgen tage.

Source Fulltext: WEIS, Heiligenkreuz (=FRA II/16, 1859) S. 80-81