Ich Weichart von Topel, Lantrichter ze Osterich, vergich vnd tv^en chvnt an disem prief allen den, die in lesent oder ho^erent lesen, die nv sint vnd her nah chvmftig sint, daz mier der erber herre prueder Ott ze den zeiten abt vnd der Convent gemain von dem Heiligen Creutz solten gelten vf die perchtnaht, di nv gewesen ist, dreizzich march silbers, ie zwen vnd sibenzich grozzer pehemischer phenning fuer ein march, da si mir ieren prief vmbe gegeben heten. Dez selben vor genanten guetes pin ich gar vnd gentzlichen gewert. Wan aber ich den vor gesprochenen heren iren brief niht wieder gegeben mohte, do von daz ich in verlorn hete, dar vmbe gib ich in disen prief fuer ieren prief ze einen waren vrchvnd, daz sev nimmer chain mensch furbaz vmb daz vor genant guet an sprechen schulle, swo si disen prief zaigent. Der ist gegeben ze Wienne do man zalt von Christes geburt Dreutzechen Iar dar nah in dem zwai vnd zwainzichisten Iar an sand Veitz tag.

Source Fulltext: WEIS, Heiligenkreuz (=FRA II/16, 1859) S. 83