Ich Chvnrat von Arenstain vergich vnd tven chunt allen den, di nv lebent vnd her nach chvnftich sint, div disen brief ansehend oder herent lesen, daz ich mit wol bedachtem muet, mit gesamter hant vnd nach rat meiner vrevnde, ze der zeit, do ich iz wol getven mocht, vnd mit meiner Hausvrowen vron Ofmein vnd mit vnserr erben guetleichem willen dem ersamen Kovent vnd aller der Samenvng datz dem heiligen chrevtz meins rechten vrein aigens dvrch meiner sel willen vnd aller meiner vordem sel willen han geschaffet daz Do^erfelein pei Chveffarn, dritthalb phvnt geltes vnd achtzehen phenneng wienner gemainer Mvniz, di da ligent auf zwain lechen vnd auf ainer hofstat vnd auf zwain weingarten, vnd daz Hertzogenburch auf zwain hofsteten vnd auf purchrecht achern zwai phvnt geltes wienner gemainer Mvniz, vnd an der Staynwant innerthalb Wilhalmspurch auf drin lechenn zwai phvnt geltes wienner phenning. Diu selben zwai phvnt geltes an der Stainwende, diu stent den Nunnen datz Tvln drevtzehenthalb phvnt wienner gewigtes, diu sol vns mein vrowe vrov Ofmei ledich machen vnd lubt vns daz die vorgenannt Offmei von Arenstayn mit iren trewen, vnd alle di weil vnd vns die vorgenanten zwai phvnt geltes an der Stainwant von den Nunnen datz Tvln nicht gelediget sint fuer div drevtzehentthalb phvnt, so sulle wir datz Chvnihesteten pei Tvln zwen weingarten vnd ain hofstat, div dient ain halb phvnt geltes wienner phenneng, In nvtz vnd in geweren haben mit alle dev vnd dar zve gehoret, als lange vntz vns mein vrowe ver Ofmei von Arenstayn div vorgenanten zwai phvnt geltes ledich machet an der Stainwant. Datz disev vorgeschriben sache vnd daz geschefte also stet vnd vnverchert beleib noch meim tot, dar vber so gib ich Chvnrat von Arenstayn dem ersamen Covent vnd aller Samenvng datz dem Heiligen Chrevtz disen prief zv aim offenn vrchvnde vnd zv ainer steten sicherhait diesev Sache versigelt mit meinn Insigel vnd mit meins veteren Insigel heren Waicharts von Arenstayn vnd mit des erberen heren Insigel Apt Maricharts, der ze den zeiten ze Chottweig Abpt was vnd mit des erberen Prelates Insigel heren Trostens, der ze den zeiten Probest datz Hertzogenburch was. Dietz ist geschehen vnd der prief gegeben datz Zekking, da von Christes gepuert ergangen waren Dreutzehen Hun-dert Iar vnd in dem drei vnd zwaintzkisten iar, an dem heiligen Ostertag.

Source Fulltext: WEIS, Heiligenkreuz (=FRA II/16, 1859) S. 89-90