Ich Dietmar Geyer von Olecht vergich an diesem prief vnd tuen chunt allen den, di nu sint oder noch chunftig werdent, di disen prief lesent oder lesen horent, daz ich mit verdachtem muet vnd mit gueter vrevnt rat vnd durich meiner Hausfrawen vrowe Gerwirgen pet willen der got genad, di mich dar vm pat pei ierem lemtigen leib vnd ich irs auch gelubt, gegeben han einen weingarten, der gelegen ist datz Medlich pei den Langen setzen vnd haizet des Geyers setze, Dem Conuent datz dem Heyligen Chrevtz in der heren sichhaus, da man dy sichen heren heren pesundleich von trosten schol nach meinen tod, ob ich in versparen mag, gentzleich vnd ledichleichen mit allem dem recht, als ich in gehabt han nach des pergez recht, durich meiner sel wille vnd durich meiner hausfrawen sel wille vnd durich vnser paider vodern sel wille zv der zeyt, vnd ich ez wol getuen macht, mit also auz genomer red, daz mich der vorgenanten Samnunge heren sichmaister, swo ich stirib, mit seiner chost nemen schol vnd fueren in daz chloster vnd pestathen in der heren freythof nach des Ordens gewonhait. Vnd daz daz stet beleib vnd vntzeprochen, darvber gib ich vor genanter Dietmar Geyer disen prief versigelten mit hern Fridreichz des Haeuzzen Insygel, der des selben weingarten perchherr ist vnd im dienet sechs phenninge ze perchrecht, zve einer offen vrchund diser sache. Daz ist geschehen nach Christes gepurd vber Drevzehenhundert Iar dar nach in dem drev vnd zwaintzigistem Iar, an sand Michelz tag.

Source Fulltext: WEIS, Heiligenkreuz (=FRA II/16, 1859) S. 90-91