Ich Chunrat von Potendorf vnd ich Rudolf sein veter wir verihen vnd tvn chund allen den, die disen prief lesent oder horent lesen, di nv lebent vnd hernah chumftich sint, daz wir mit vnser erben vnd auh vreunt gutem willen vnd gunst haben gigeben der Samnunge vnd dem Chloster ze dem heiligen Chreutze durch got vnd durch vnser sel hail vnd auh aller vnser vodern sel willen, vnd durch der lieb vnd andaht willen, di wir habn zv dem vorgenantem chloster, ain aigenschaft aines gutes, daz gelegen ist ze Arnsteten, daz di Weidervelder Jacob vnd Vlreih habent von vns ze lehen gehabt vnd habn ez verchoufet der vorgenanten Samnunge vnd dem Chloster mit vnserm gutem willen. Die aigenschaft habn wir in gigeben ledichleih ze habn mit allem dem reht, als wir sei habn inne gehabt vnd alle vnser vodern, vnd dar vber geben wir, ich vorgenanter Chunrad van Potendorf vnd ich vorgenanter Rudolf sein veter der vorgenanten Samnung vnd dem chloster ze dem heiligen chreutz disen prief ze ainem offen vrchund, versigelten mit vnsern ynsigeln. Diser prief ist gegeben nach Christes gepurde vber dreutzehenhundert iar dar nah in dem drev vnd zwaintzigisten iar, an aller hailigen tage.

Source Fulltext: WEIS, Heiligenkreuz (=FRA II/16, 1859) S. 92