Ich Hainrich von Sibenhirtten vnd ich Jeutte sein havsvrowe wir veriehen vnd tun chunt alle den, die disen prief lesent oder horent lesen, die nv lebent vnd hernach chvnftich sint, daz wir mit vnser erben guetem willen vnd gunst, mit verdahtem mute vnd mit gesampter hand zv der zeit, do wir iz wol getun mochten, verchauft haben vnsers rechten aigens dreuzehen schilling vnd sechs phenninge geltes wienner mvnze, die da ligent ze Reinhartestorf avf einem lehen vnd avf einer hofstat mit allem dem nvcze vnd recht, als wir si in aigens gewer her pracht haben, vmb anderthalb phunt vnd vmb dreizzich phunt wienner phenninge, der wir recht vnd redlichen gewert sein, dem erbaern manne Perhtolden von Ebental vnd seiner havsvrowen vron Katharein vnd allen irn erben fvrbaz ledichlichen vnd vreilichen ze haben vnd allen iren frvmen do mit ze schaffen, verchovfen, versetzzen vnd geben, swem si wellen an allen irresal. Vnd dar vber durch pezzer sicherhait so seczzen wir vns ich hainrich von Sibenhiertten vnd ich Jeute sein hausvrowe vnd ich gerunch von Sibenhiertten vnd ich Vlrich der Mairhover vnuerschaidenlich mit sampt allen vnsern erben Perhtolden von Ebental vnd seiner hovsvrowen vron Katharein vnd allen irn erben vber die vorgenanten Drevzehen schillinge vnd sechs phenninge geltes wienner mvnze zv rechtem gewer vnd scherm fur alle ansprach, als aigens recht ist vnd des landes recht zv Osterreich. Waer aber, daz si an der vorgenanten gvlte mit recht dahainen schaden naemen, den selben schaden schvllen si haben avf vns vnd auf allem vnserm gvt, daz wir haben in dem Lande zv Osterreich. Vnd geben in dar vber diesen prief zv einem offen vrchunde vnd zv einem waren gezevge diser sache versigilten mit vnserm insigiln, vnd sint avch des gezevg her Vlrich von Pilihdorf, her Otto sein pruder, her Chadolt von Ekhartesawe. her Weichart der haerinch. Chvnrat der haerinch. Alber der Triwe vnd ander frvme levte genvch, den dise sache wol chvnt ist. Diser prief ist geben zv wienne nach christes gebvrt Drevzzehen hvndert iar in dem Drev vnd zwainczgistem iar dar nach, an dem Perchttage.

Source Fulltext: WEIS, Heiligenkreuz (=FRA II/16, 1859) S. 86-87