Ich Oth der Tuersse von Rauchenekke vergieh vnd tun chvnt allen den, die disen prief lesent oder horent lesen, die nv lebent vnd hernach chvnftich sint, daz paul der Maer von Nidernleizze Vnd sein hausvrowe vro Peters Vnd ir erben von mir zv rechtem lehen gehapt habent zehen schillinge wienner phenninge geltes auf einem lehen behauster holden gestiftez gvtes, daz da lait datz Nodendorf, mit alle dev vnd dar zv gehort ze velde vnd ze dorf, gestift oder vngestift, versvecht oder vnversvecht, swie so daz genant ist, vnd habent daz selbe gvt verchauft vnd ze chaufen geben den erbarn Geistlichen levten, pruder Jacoben zv den zeiten Apt zv dem Heiligenchrevtze vnd der Samnunge gemaine, als si besvnderlich prief von in habent versigilt mit meinem insigil, Vnd mit Jansen insigil meins svns, vnd mit Pauln insigil des Maer vnd mit seins pruder insigil Jansen. Die aigenschaft der vorgenanten gvlte han ich Ott der Tuersse mit willen vnd gvnst meines svns Jansen vnd ander meiner erben mit verdachtem mvte zv der zeit, do ich iz wol getun mochte, aufgeben den egenanten Geistlichen levten zv dem heiligenchrevtze fvrbaz ledichlichen vnd vreilichen zehaben vnd allen irn frumen da mit ze schaffen, verchauffen, versetzen vnd geben, swem si wellen an allen irresal. Vnd sein auch wir ich Ott der Tuersse von Rauchenekke vnd ich Jans sein svn vnverschaidenlich mit sampt vnsern erben der vorgenanten aigenschaft der egenanten gvlte vnd swaz dar zv gehort, als vor verschriben ist, der vorgesprochen Geistlichen levte zv dem heiligenchrevtze vnd aller ir nachchomen rechter gewer vnd scherm fvr alle ansprach, als aigens recht ist vnd des landes recht ze Osterreich. Vnd daz disev sache fvrbaz von vns vnd von allen vnsern nachchomen also ewichlichen staet vnd vnverwandelt beleibe, dar vmb so haben wir in geben disen prief zv einem offen vrchvnde vnd zv einem waren gezevge vnd zv einer ewigen vestnvnge diser sache versigilten mit vnser paider insigiln. Diser prief ist geben ze Wienne nach Christes geburt vber Drevtzehenhundert iar in dem Dreitzgisten iar dar nach, an dem Pluemoster abent.

Source Fulltext: WEIS, Heiligenkreuz (=FRA II/16, 1859) S. 135