Ich Otte von Pilichdorf vnd ich Chvnigunt sein hausvrowe vnd vnser paider Erben, wir veriehen vnd tun chvnt allen den, di disen prieflesent oder horent lesen, di nv lebent vnd hernach chunftich sint, daz wir mit gvten willen vnd gunst, mit verdachtem mvte vnd mit gesampter hant zv der zeit, do wir iz wol getan mochten, Vns lauterlich vnd gaentzleich Verzeichen vnd verzigen haben alles des rechten, daz wir gehapt haben an dem Guet datz Nodendorf, iz sei lehenschaft oder aigen oder wie iz genant sei, daz die Geistlichen leute Pruder Jacob zv den zeiten Apt zv dem heiligen chrevtz vnd die Samnunge gemaine gechauft habent von Paulen dem Maern vnd von Jansen seinem pruder von Nidernleizze Vnd von irn erben; Vnd geben dar an allev die recht auf den egenanten Geistlichen leuten zv dem Heiligen chreutz, die wir an dem selben gut gehabt haben Vnd geben in dar vber disen prief zv einem offen vrchunde Versigilt mit vnserm insigil. Der prief ist geben nach Christes geburt Dreutzehenhundert iar, dar nach in dem Dreitzgisten iar, an sand Gregorien tage.

Source Fulltext: WEIS, Heiligenkreuz (=FRA II/16, 1859) S. 133