Wir Pruder Jacob zv den zeiten Apt datz dem heyligen Chrevtze vnd wir pruder Wulffing Obrister Prior vnd wir pruder Chalhoch, Obrister chelner vnd vnser sampnunge gemain da selbens, veriehen vnd tvn chunt allen den, die disen prief lesent oder horent lesen, die nu lebent vnd hernach chvnftich sint, daz der erber man, her Herbort von Saltzpurch mit rechtem fvrsatze vnd mit guter andacht levterlichen durch got, durch seiner sele vnd durch seiner hovsvrowen selen willen, vron Kathrein vnd alle ire vodern sele willen ze Troste, recht vnd redelichen mit vns geworben vnd gechovft hat ain ewige messe, die man alle Tage sprechen schol in vnserm Siechhovse vnd hat vns dar umb geben ledechlichen viertzich march Silbers wienner gewichtes, ie zwen vnd sibentzich grosse pehemischer phenninge fur ain iegliche march, der wir gar vnd gentzlichen gewert sein vnserm chloster ze hilffe, so daz die selben vorgenanten messe alle wochen besunderlingen ain priester sprechen schol alle Tage vnsers Ordens got ze lobe In dem egenanten Siechhovse vnd die andern wochen dar nach ain ander priester vnd schol die selbe ewige messe alle wochen vmb vnd umb gen von ainem priester vntz an den andern. Dar vmb daz dechain neit oder chrieg dar zwischen icht sei vnd swelcher priester seine wochen die vorgenanten messe alle Tage spricht oder gesprochen hat, als er ze rechte schol, Dem schol man geben die selben Wochen alle mal zv seiner phro^ende vnsers Trinchens ainen chopf weins vnd ain weiz herten prot vnd zway ayer vnd ain gerichte von vieschen, Die zwaier phenninge wert sein, oder zwen berait wienner phenninge da fur, ob daz wer, daz man der viesche niht gehaben mechte; also mit auzgenomner rede, daz wir vns des gentzlichen gemainlichen gegen Im verpunden haben mit vnsern Tre^ewen, Daz wir daz vorgenante selgerete gantz vnd stete haben schvllen vnd gentzleichen volfuren in allem dem rechte‚ als an disem prief geschriben stet vnd swelcher apt‚ Prior oder Chelner nach vns chvnftich wirt, der ditz vorgenante selgerete hindert mit worten oder mit werchen vnd die vorgenanten ewigen messe hinderten, so daz sie abegienge, der schol got dar vmb antwurten an dem jvngisten Tage vnd schullen auch denne die Nevn phunt geltes Purchrechtes, die wir im dienen vnd gedient habent ze rechten Leipgedinge von vnserm weingarten, der da leit an der Dvrrenwerich des anderthalb jeuch ist, als er prief vnd hantfesten besunderlingen von vns dar vber hat versigilten mit vnserm Insigil, furbas Ledichleichen gevallen vnd beleiben den Herren hintz Lehenvelde (sic) In allem dem rechte, als wir si im gedient haben vnd furbaz diennen scholden, vnd im verschriben ist vnd schullen auch sev die vorgenanten messe ewichlichen begen vnd sprechen in irm chloster gleicher weiz recht, als wir sie im verschriben vnd gemacht haben an disem prief an so vil, daz daz einev phunt geltes purchrechtes ewichlichen pei vns beleiben schol, daz daz zehente phunt geltes gewesen ist vnd gehort hat zv den vorgenanten Nevn phunden: vnd schullen auch im alle iar seinen Iartag begen da von in allem dem rechte, als sein hantfeste saget, die er von vns dar vber hat versigilten mit vnserm Insigel. Vnd daz dise rede vnd dise sache furbaz also stete sei vnd vntsebrochen beleibe, dar vber so geben wir Im disen prief ze ainem offen vrchunde vnd gezevge vnd ze ainer ewigen vestnunge diser sache, versigilten mit vnserm Insigel vnd mit des edlen Fursten insigel, vnsers gaistlichen vaters vnsers herren Pischolf Albrechts von Passowe vnd auch mit des erbern herren Insigel apt Mauritius von den Schotten ze wienne, die diser sache gezeuge sint mit iren Insigeln, vnd sint auch des gezevge die gaistlichen Levte prvder Vlreich vnser Spitalmaister, pruder Michl der Chammerer, pruder Jacob der phorftener, pruder Wolfhart der vnter prior vnd ander vnser pruder genuch, den dise sache wol chunt ist. Diser prief ist geben ze wienne nach Christes gepurt Drewtzehenhundert Iar, Darnach in dem Dreizzigistem Iar an dem Perichtage.

Source Fulltext: WEIS, Heiligenkreuz (=FRA II/16, 1859) S. 128-129