Capitulum Jauriensis ecclesie omnibus christi fidelibus presentibus pariter et futuris presentes litteras inspecturis Salutem in domino sempiternam. Ad vniuersorum noticiam harum serie volumus peruenire, Quod Andreas filius Johannis de possessione Bezene, Comitatus Musuniensis ab una parte, frater Conradus ordinis Cysterciensis clauiger videlicet de nouo predio domini Regis iuxta lacum Ferteu, pro Religiosis et deo amabilibus viris, domino Jacobo abbate totoque Conuentu eiusdem ordinis Monasterii Sancte Crucis de Austria ex altera, coram nobis personaliter constituti, Antedictus Andreas, filius Johannis est confessus et retulit uiua voce, quod Dominicus, filius Petri filii Rach de Machkad, socer eius cum domina Margaretha consorte sua dudum ob remedium salutis animarum suarum et suorum progenitorum medietatem prefate possessionis Machkad contulerit et donauerit cum suis vtilitatibus quibuslibet dicto Monasterio Sancte crucis possidendam. Preterea memoratus Andreas aliam medietatem eiusdem possessionis Machkad vocate per eosdem, socerum suum et socrum donatam sibi et legatam modo consimili ob remedium anime salutis sue proprie, ac domine Benedicte consortis sue, nec non progenitorum suorum similiter cum vtilitatibus vniuersis, quocumque nomine censeantur, scilicet piscaturis, terris arabilibus ac feneto dictam possessionem contingentibus et nichillominus acceptis viginti talentis denariorum latorum viennensium a fratribus Herthone procuratore de dicto predio nouo domini regis et Chonrado iuxta lacum Ferteu commorantibus dedit, tradidit et contulit eisdem, domino abbati et conuentui dicti Monasterii sancte crucis perpetuo et irreuocabiliter possidendam, tenendam et habendam, nullum sibi ius in eadem reseruando. Que quidem possessio adiacet inter possessiones Ladizlai filii Heym, Thuled vocate a plaga orientis, a parte uero meridionali, occidentali et aquilonis inter possessiones eorumdem fratrum de nouo predio Pothfolwa vocate. Ceterum assumpserunt ijdem fratres, quod, si in districtu comitatus Musuniensis infra duo uel tria miliaria diuina vocacione ipsum Andream mori contigerit, funus eiusdem usque ad dictum Monasterium sancte crucis deferri facient et sepeliri cum honore. Addicimus eciam‚ quod nobilis vir magister Peheut Castellanus de Owar, et vice comes Musuniensis, nec non Johannes filius Walentini, officialis eiusdem, per suas litteras nobis directas donacioni et collacioni ac perpetuacioni prefate possessionis Machkad plenum consensum prebuerint et assensum. In cuius rei memoriam et perpetuam firmitatem presentes concessimus litteras appensione nostri sigilli autentici munimine roboratas. Datum in vigilia omnium sanctorum anno domini millesimo CCC° Tricesimo. Magistris Mathya lectore, Georgio Cantore ceterisque fratribus et dominis ecclesie nostre existentibus.

Source Fulltext: WEIS, Heiligenkreuz (=FRA II/16, 1859) S. 140-141