Albertus dei gracia Dux Austrie et Styrie, dominus Carniole, Marchie ac Portusnaonis, Omnibus tam presentibus quam futuris in perpetuum. Quamquam Ecclesiastica loca personasque Religiosas promocionis generalis iugiter zelemur affectu, ceteris tamen precellencius singularis gracie nostre et continue pietatis Ecclesiis illis fructuosus debetur effectus, quas Illustrium predecessorum nostrorum, Ducum Austrie fundauit ad gloriam et laudem dei benignitas et dotatas magnifice comendauit colendas studiis et fauoribus successorum, Hinc igitur est, quod, cum Discreti viri Hermannus dictus Rorbekch et fratres sui, Decimam sitam in Gostesdorf et Plumental circa Spannberch et Nydernsulz, quam a nobis et fratribus nostris, Ducibus Austrie, in fevdum hactenus tenuerunt, Honorabilibus et Religiosis viris Fratri Jacobo, nunc Abbati et Conuentui Monasterii sancte Crucis in Silua wiennensi, pro octoginta talentis denariorum wiennensium de consensu nostro vendiderint et assignarint, Quod nos aduertentes, dictum Monasterium Honorabilem et memorialem Plantulam fore Illustrium quondam Principum Ducum Austrie, predecessorum nostrorum, ac igitur cupientes, ipsum prosequi fauore et gracia speciali, ipsis Abbati et Conuentui et Monasterio ad deuotam et instantem supplicacionem eorumdem proprietatem eiusdem decime, sicut nobis et fratri nostro Duci Ottoni, pertinuit, de ipsius fratris nostri scitu et consensu liberaliter dedimus et presentibus tradimus et donamus ad vsus et vtilitates dicti Monasterii in antea possidendam perpetuo et tenendam. In cuius rei euidenciam firmitatemque perpetuam presentes nostri sigilli munimine fecimus roborari. Datum wienne, Dominica, qua cantatur Letare. Anno domini Millesimo CCC°. Tricesimo secundo.

Source Fulltext: WEIS, Heiligenkreuz (=FRA II/16, 1859) S. 149-150