Ich Herman von Rorbach vnd Ich Perchte sein Havsvrowe vnd ich Otte von Rorbach sein pruder vnd Ich Margret sein Havsvrowe vnd Ich Cholman von Rorbach ir Pruder vnd Ich Wentele sein Havsvrowe vnd ich wernhart von Rorbach ir Pruder, Wir veriehen vnd tvn chunt allen den, die disen prief lesent oder horent lesen, die nv lebent vnd her nach chvnftich sint, Daz wir mit vnsers Pruders guten willen vnd gunst Lvdeweyges vnd auch aller vnserr erben mit verdachten mute vnd mit gesampter hant nach vnser pesten vreunde rat zv der zeit, do wir ez wol getun mochten, vnd auch mit vnserr Lehen herren handen, der Edlen vnd der Hochgebornen fursten der Hertzogen in Osterrich recht vnd reddelichen verchavft haben vnsers rechten Lehens, das wir von In gehabt haben, vnsern Getrayde zehenten, der da leit ze Gozzenstorf vnd ze Plumental auf viertzehen lehen vnd auf Sibentzzich Jeuchen, vnd allez daz dar zv gehoret ze holtz, ze velde vnd ze dorff, ez sei gestift oder vngestift, versucht oder vnuersucht, swie so ez genant ist. Daz haben wir alles verchavft vnd geben mit allem dem nutze vnd rechte, als ez vnser vodern vnd auch wir vnuersprochenlichen in Lehens gewer her pracht haben vnd vns mit rechte an chomen ist, vmb achtzich phunt phenning wienner Mvntze, der wir gar vnd gentzlichen verricht vnd gewert sein, dem erbern Gaystlichen herren Pruder Jacoben, zv den zeiten apt Datz dem Heyligen Chreutze vnd dem Convent daselbens vnd allen iren nachchomen Ledichlichen vnd vreilichen zehaben vnd zv besitzen, vnd furbaz allen iren frumen damit ze schaffen, verchauffen, versetzen vnd geben, swem sev wellen, als In daz aller peste chom vnd fuege an allen irresal; also daz wir vnd vnser Pruder vnd alle vnser erben furbaz gegen In vnd irm Convent vnd alle iren nachchomen dechainen chrieg noch dechain ansprach darauff nimmermer gehaben schullen. Vnd auch, wand etliche vnser naehsten erben nicht vogtpar sint vnd etliche inner Landes niht entsint, darvber durch pezzer sicherhait so setzen wir besunderlingen Ich vorgenanter Otte von Rorbach vnd ich Margret sein havsvrowe vnuerschaidenlichen mit sampt vnsern erben vnsers rechten aygens, ainen halben hof ze Rorbach vnd swaz darzv gehoret mit allem dem nutzze vnd rechte, als wir In auch unuersprochenlichen in aygens gewer her pracht haben, vnd auch wir, Ich vorgenanter herman von Rorbach vnd ich Perchte sein havsvrowe vnd ich Cholman vnd ich Wentele sein havsvrowe vnd ich wernhart von Rorbach ir Prudere vnuerschaidenlichen mit sampt vnsern erben dem egenanten Pruder Jacoben, dem apte von dem heyligen Chrevtze vnd dem Conuent da selbens vnd allen iren nachchomen vber den vorgenanten zehenten vnd alles daz darzv gehoret, als vor geschriben stet, fur sev vnd fur vns vnd fur alle vnser erben vnd fur alle die, die furbaz Tail oder recht daran suchent oder fodernt pei vnserm lebentigem Leibe oder nach vnserm Tode, ze rechter aebentevr vnd auch ze rechtem gewern vnd scherm fur alle ansprache, als Lehens recht, aygens recht vnd aebentevr satzzunge recht ist vnd des Landes recht in Osterreich, als lange vntz daz in die selben erben iren tail gar vnd gentzlichen auf geben mit iren handen, als sev ze rechte schullen vnd in den auch bestettigen nach Landes rechte vnd swaz in furbaz mit rechte daran abget, daz schullen sev haben vnuerschaidenlichen auf vns vnd auf vnsern trewen vnd auf allem dem gut, daz wir haben in dem Lande ze Osterrich oder auzzer Landes, wo wir ez haben, wir sein Lebentig oder Tod. Vnd daz diser chavf vnd diese rede furbaz also stete sei vnd vnzebrochen beleibe, darvber so geben wir In disen prief ze ainem offen vrchunde vnd ze ainem waren gezevge vnd ze ainer ewigen vestnunge diser sache versigilten mit vnsern anhangenden Insigeln. Diser prief ist geben ze wienne nach Christes geburt Drevtzehenhundert Iar darnach in dem zway vnd Dreizzigistem Iar, des Svntages ze Mitter vasten.

Source Fulltext: WEIS, Heiligenkreuz (=FRA II/16, 1859) S. 148-149