Ich Chunrat der Wiltwercher, purger ze Wienn, vergich vnd tun chunt allen den, die disen prief lesen oder horent lesen, di nu lebent vnd hernach chumftig sint, Daz Ich ze der zeit, da ich ez wol getun mochte, gemacht vnd gegeben hab dem haus vnd der samnunge Daz dem heiligen Chreuzze Drei phunt ewiges geltes purchrecht, die do ligent dacze der Erburch auf weingerten, der mann in dienet ze sand Michels Tag zwelf schillinge vnd an sand Jorgen Tag zwelf schillinge; also mit ausgenummer redde, Das si ierleihen darvmb ain selampt begen schullen des nahsten Tages nach sand Marchs Tag durch meiner sel vnd durch aller meiner vodern sel hail willen. Wer aber, das sie des nicht intaeten, so schol in furbas das gelt abgen. Vnd darvber gieb ich in disen prief ze ainem waren gezeuge vnd ze ainer ewigen vestunge diser sache, versigelten mit meinem Insigel. Der ist geben ze Wienn des nachsten Samstages nah dem Svnwend Tag, nach Christes geburt dreuzehen hundert iar in dem drei vnd dreyzigisten Iar.

Source Fulltext: WEIS, Heiligenkreuz (=FRA II/16, 1859) S. 157